Shillong: Ka Meghalaya Football Association (MFA) ka sngew kmen shi katdei ban pyntip ba ka nongbah Shillong, la jied ia ka kum kawei na ki jaka ban ioh ban pynlong ia ka lympung ialehkai phutbol ba kyrpang ia ki kynthei, ka Indian Women’s League 2026-27 (IWL 2).
Ka nongbah Shillong ha kane ka kynti ba mynta la jied ia ka ba kan ioh ba kan pynlong ia ka Group C, ia kaba la rai ban pynlong ia ka ha SSA Stadium, Polo ban sdang naduh u bnai u ban wan, kaba hangne ka khubor ba sngewtynnad pat ka long ba ka kynhun ialehkai ka Jakren FC, kiba rah ia ka nam lahduh jong ka lympung Meghalaya Women’s State League 2025 kin ioh ba kin ia aireng ha ka sien ba nyngkong.
Kumban shu pynkynmaw ba haduh kane ka khyllipmat ba mynta, ym pat juh don satia kino kino klob ialehkai phutbol kynthei nangne napoh ka jylla ban iakhun ha ka IWL ne IWL 2, kaba lada don teng ruh ka long tang ka kynhun ka Royal Wahingdoh ia kaba la shu khot sngewbha ia ki ban iashim bynta sha ka jingiaknieh ruh sha ka IWL ha ka por ba la pynlong nyngkong ia ka ha ka samoi ialehkai 2016-17.
Pynban da ka jingioh jngai ki nongkit kam ba mynta ka MFA, ba ki shin ia ki ia ka sien jam ban pynlong ia ka lympung ba kyrpang ki kynthei ha u snem ba la dep, ba ka kynhun ialehkai ka Jakrem ki long ka kynhun kaban ioh iakhun sha ka IWL 2.
Ha kane ka kynti ia ka Jakren la pyniakap lang ia ka bad kiwei pat ki kynhun ba kynthup ia ka All India Football Federation’s TDS Academy, Kemp FC bad Mumbai Knights FC
Ki kynhun ba long lahduh na ki group ba sa artylli ki best second place team kin jam sha ka wat iakhun kaba khatduh ia kaba la buh ban pynlong ha u bnai Naiwieng mynta ka snem.
Wat la kane ka lympung kadei kyrpang naka bynta ki klob, pynban kane ka long pat ka kabu ksiar ia ka MFA, ba kan khmih bad shim na ka IWL 2 kum kawei na ki jingpynkhreh ka jong ka, ia la ka kynhun ki thei ialehkai ban mihkhmat pat ia ka jylla ha ka por ba kan pynlong ia ka 39th National Games hangne hapoh ka jylla.
