SHILLONG: U MLA ka West Shillong bad nongialam rangbah ka UDP, Paul Lyngdoh, u la ong ba ka rai jong u na bynta ka lawei ha ka saiñpyrthei kan shong ha ka jingmut jong ki nongkyrshan, ki nongtrei bad ki nongthep vote jong u.
Haba kylli la un dang sah ha ka UDP ne un leit sha kawei pat ka party, u la ong, “Ki lad baroh ki dang plie. Kaba kongsan ka long ban sngewthuh ia ka jingmut jong ki nongkyrshan, ki nongtrei bad ki nongthep vote.”
U Bah Paul u la ong ba ka UDP mynta ka don ha ka jinglong kaba kyrpang namar ka bor jong ka party ka la hiar sha tang katto katne ngut ki MLA.
“Baroh kan shong ha ka jingbishar bniah ia ka jinglong-jingman. Kane kam dei ka jinglong kaba ju jia man ka por, namar ka party ka la hiar sha ka bor kaba rit bha, bad ka lah ban hiar shuh shuh,” u la ong.
U la ong ruh ba ki mat kiba jia ha ka ri baroh kawei kin ktah ruh ia ka rai jong u, kynthup ia ki jingïakren kiba iadei bad ka Election Commission bad ka SIR.
Haba la kylli shaphang ki nongrim kiba yn pyndonkam ban shim rai, u Bah Lyngdoh u la ong ba ka dang kloi ban jubab namar ka jingkylli ka dang long tang “lada”.
Haba la kylli lada ka jingkylla ha ka saiñpyrthei mynta kan ktah ia ka 2028 Assembly election, u la ong ba ha ka saiñpyrthei ym ju don ki paralok ne ki nongshun kiba neh junom.
U la kdew ruh ba ka Meghalaya ka la ju don ki seng kiba long ki nongialeh pyrshah shuwa ka election, hynrei kiba wan ban iatreilang hadien ka election.
U la ong ba ka jinglong-jingman mynta ka dang dum bad ym pat shai. Ka jylla ka dang ap ia ka Shillong Parliamentary bypoll bad ka GHADC election.
“Hadien ba ngi la iaid lyngba kine ki ar tylli ki election, ngin sa lah ban sngewthuh shai kham bha ia ka jinglong-jingman jong ka saiñpyrthei ha ka jylla,” u la ong.
