U Myntri Rangbah ka Jylla, u Bah Sniawbhalang Dhar u la plie ïa ka Rilang College ha shnong Mawsaw ha South West Khasi Hills district ka ban plie lad ïa ki samla ka thaiñ ba kin ïoh ban bteng ïa ka jingpule jong ki.
Ha ka sngi ba plie ïa kane ka kolej ha ka 30 tarik (sngi Saitjaiñ), la sakhi lang da u MLA ka Mawkyrwat u Bah Renikton Lyngdoh Tongkhar lem bad kiwei kiwei ki riewpawkhmat.
Haba plie ïa ka kolej, u Bah Dhar u la pynbna ruh T.5 lak ban kyrshan ïa ka kolej na ka bynta ka jingsiew tulop ïa ki nonghikai.
Haba ai jingkren, u Symbud Myntri Rangbah u la pynkynmaw ba la buh ïa u mawnongrim ka Rilang College, ha u snem 2019 ha kaba ka kam ka la nang ïaid kyndon pa kyndon bad na u snem u sha u snem tad haduh ban da da dep.
U la ong ba kano kano ka kam kaba da leh bha, wat lada ka shimpor, kan long ka jingtei kaba khlaiñ bad kaba kham bha.
U Bah Dhar u la kdew ruh khyndiat kumno ka pule puthi ka nang kiew ha Mawkyrwat konstitwensi lyngba ka jingdon ki skul kiba thymmai, nalor ka jingpynwanrah ïa ka JNV sha Mawkyrwat bad ka jingpynkhreh ban tei ïa ka EMRS.
La bun phew snem ki khynnah skul kiba pule ha JNV ki hap leit shaduh Nongstoiñ hynrei mynta ka JNV ka la don ha Mawlangwir.
U la ong ruh ba ha kine ki phra snem, ka Sorkar Jylla ka la mang pisa na ka bynta bun dorjon ki ïing skul bad la lah ban shna thymmai bun tylli ki ïing skul.
U la ïaroh ruh ïa ka thaiñ bad ka rukom ïaid lynti ban pdiang ïa ki kam pynroi ha kaba ki briew ka thaiñ Mawkyrwat ki don ka mynsiem ïatreilang na ka bynta ka jingbha lang jong baroh.
Ha kaba ïadei bad ki jingdonkam jong ka kolej kynthup ka jingker, u Bah Dhar u la kular ban leh ei ei bad lada ym pat lah ban leh lut ban pyndep haduh 600 mitar, yn sa leh shwa khyndiat khyndiat, bad u la pynbna ruh ïa ka jingnoh synñiang kaba T.5 lak kum ka jingïarap ban siew tulop ïa ki nonghikai.
U la ong ba ka jingplie ïa ka Rilang College kan dei ruh ka bynta bakhraw eh lyngba ka jingtrei shitom u MLA (Bah Renikton Lyngdoh Tongkhar) uba la lah ban pynurlkng ban plie ïa ka kolej kaba thymmai kaba long shisha ka nuksa babha kaba kiwei ki hap ban bud.
