SHILLONG, Risaw 6: U Myntri Rangbah ka Jylla, u Conrad K. Sangma, u la pynshai ba ka Sorkar Meghalaya kan ym shim kano kano ka rai marwei halor ka jingïakajia kaba ïadei bad ki Block I bad II, hynrei kano kano ka sienjam shakhmat kan long tang hadien ka jingïakren bad ki nongïashim bynta baroh.
Haba la kylli lada ka Sorkar kan pynbor ban pynlong ïa ka jingpynshisha ha ka jaka ïa ki jaka ba la kdew ha ka jingpynbna jong u snem 1951, kaba la buh ïa ki Block I bad II na Jowai sha ka United Mikir and Cachar Hills District ha katei ka por, u Conrad u la ong ba kine ki ar tylli ki bynta kin ïaid ryngkat.
“Ngim peit tang ïa kawei ka bynta. Ka jingïakren kan bteng. Hynrei katba ngi dang ïakren ban wad ïa ka lad pynbeit, ngin pynthikna ba baroh kiba don bynta kin ïoh ïa ka jingïashim bynta,” u la ong.
U Myntri Rangbah u la ong ruh ba ka nongrim jong u halor kane ka mat ka la neh kumjuh naduh kaba sdang, kata ba kano kano ka rai kaba ïadei bad kane ka bynta ka dei ban long hadien ka jingïakren bad ka jingmynjur jong ki paidbah.
“Pynban ïa kano kano ka sienjam kaba ngi shim, kan long ha ka jingïakren bad ki nongïashim bynta bad ki paidbah. Ngim ju leit shakhmat khlem ka jingïakren, ka jingkyrshan bad ka jingtei ïa ka jingïasngewthuh lang ban pynbeit ïa kane ka jingeh,” u la ong.
U Conrad u la batai ba ka jingïakajia Block I bad II ka dei kawei na ki mat jingïakajia hapdeng ki jylla kaba jwat bad kaba donkam ïa ka jingshai bad ka jingïasngewthuh lang.
“Ka dei ka mat kaba jwat bad kaba donkam ban leh da ka jingsngewthuh bha. Ha ki snem kiba la leit, bun ki Sorkar kim shym la nud ban pynbeit ïa kane ka mat. Ka dei tang ka Sorkar ba ïalam da ka NPP kaba la pyrshang ban trei ban wad ïa ka lad ban pynbeit ïa ka,” u la ong.
U la bynrap ba watla ka jingïakajia ka long kaba jwat, hynrei lada baroh ki ïatreilang bad tei ïa ka jingïasngewthuh lang, ka lah ban don ka lad ban pynbeit ïa kane ka jingeh.
“Kam long kaba suk, hynrei lada ngi trei lang bad tei ïa ka jingïasngewthuh lang, ngin lah ban pynbeit ïa kane ka jingeh. Kata ka dei kaei kaba ngi dang trei mynta,” u la ong.
