SHILLONG : U Myntri Rangbah ka Jylla, u Conrad K. Sangma, ha ka sngi Ba-ar u la ong ba ka jinglong jingman ka pla pisa jong ka Meghalaya ka dang long kaba skhem bad u la kyntait ïa ka jingpynïadei hapdeng ka jinglong ka pla pisa jong ka Jylla bad ka jingpynslem shipor ban ïoh ïa ka pisa na ka Jal Jeevan Mission (JJM).
“Ka jinglong jingman jong ka pla pisa jong ka Jylla mynta ka long kaba skhem bha. Ym don satia ka jingkhuslai halor ka jingshngain ka pla pisa jong ka Jylla,” ong u Myntri Rangbah.
U la ong ba baroh ki jingioh lum pisa ba kynthup naduh ka khajna jong ka Jylla, ka bynta na ka khajna jong ka Sorkar Pdeng, ki skim ba kyrshan da ka sorkar pdeng, ki jingkyrshan pisa na ka Sorkar Pdeng bad ki projek kam pynroi kiba ïoh jingïarap na Shabar, la pyndonkam da ka rukom kaba dei ban pynïaid ïa ka roi ka par bad ban pynneh ïa ka jingskhem pisa.
Haba kren halor ka pisa kaba dang sahteng jong ka JJM, u Conrad u la ong ba ka jingeh ka dei tang ha ka rukom treikam jong ka Sorkar Pdeng.
“Ka JJM ka dei ka projek mission mode kaba ïoh jingïarap pisa 90:10 na ka Sorkar India. Namar ba ka dei ka projek mission mode, hadien ba la dep san snem, ka jingïarap pisa ka la sangeh. Ka la donkam ïa ka jingmynjur jong ka Cabinet ka Sorkar Pdeng ban pynim biang ïa ka mission,” u la ong.
U la bynrap, “Ka jingsangeh hapdeng ka por ba ka mission ka la kut treikam bad ka por ba ka kynhun myntri kan mynjur ban pynjlan ïa ka, ka la pynlong ïa ka jingpynslem ban pyllait ïa ka pisa. Ka Ministry of Finance kam lah ban pyllait ïa ka pisa namar ka por jong ka mission ka la kut bad ka Cabinet kam pat shim ïa ka rai ban pynjlan. Kane ka dei ka jingeh kaba ïadei tang bad ka projek bad ka mission.”
Ha kajuh ka por u la pynshai pat ba mynta ka jingeh ka la kut.
“Ka pynkmen ïa nga ban pyntip ba ka Kynhun Myntri jong ka Sorkar Pdeng mynta ka la mynjur ïa ka, bad mynta ka mission kan bteng,” u la ong.
U la ong ba ka Ministry of Finance ka la buh ïa ki kyndon kiba thymmai ïa ka Ministry of Jal Shakti, kiba hap ban bud da ki jylla.
“Ka Meghalaya mynta ka la pyndep jan baroh ki kyndon bad ka song pisa kaba nyngkong kan sa pyllait sha ngi shen, kaba kan ïarap ïa ngi ban pyllait pat ïa ka pisa,” u la ong.
“Kane kam don jingïadei satia bad ka jinglong jingman ka pla pisa jong ka Jylla. Ka jingeh ka ïadei tang bad ka JJM,” u la bynrap.
