Shillong, Risaw 8: U Secretary ka Department of Food and Public Distribution jong ka Sorkar India, u Sanjeev Chopra, ha ka sngi Palei u la plie paidbah ïa ka Command and Control Centre ha ka ophis jong ka Directorate of Food, Civil Supplies and Consumer Affairs ha Shillong, kaba dei ban buddien ïa ka jingïaid ki kali kiba kit ïa ki marbam.
Haba kren sha ki lad pathai khubor hadien ka jingplie ïa kane ka Centre, u Chopra u la ong ba kane ka rukom treikam kan ai lad ïa ki bor sorkar ban buddien ïa ki kali kiba kit ïa ki marbam naduh ki depot haduh ki Fair Price Shops lyngba ki GPS kiba la buh ha ki kali, lane lyngba ki mobile phone jong ki nongñiah kali.
Ka Command and Control Centre kan pynlah ïa ki ophisar ban peit ïa ka jingïaid jong ki kali ha ka por kaba ki dang ïaid, bad ban pynshisha ruh la ki marbam ki poi ne em sha ki jaka ba la buh.
U Chopra u la ong ba kane ka sienjam kan ïarap ruh ban pynbeit ïa ki jingujor halor ki kali kiba ym poi sha ki Fair Price Shops, kumjuh ruh ban lap ïa ki jingjia ha kaba lah ban don ka jingïalam bakla ïa ki marbam ne kiwei pat ki jingpynkheiñ aiñ.
Ha kum kine ki jingjia, ki bor sorkar kin lah ban lap bad buddien mardor ïa ki kali kiba donkti bad shim ïa ki sienjam kiba donkam.
Ha ka jingïalang jingplie la ïadonlang ruh u Commissioner bad Secretary, Pravin Bakshi, IAS, u Director I. Mawlong bad kiwei kiwei ki ophisar.
