SHILLONG : U MP Rajya Sabha na Meghalaya, u James Pangsang Kongkal Sangma, u la kyrpad ïa ka Joint Committee kaba peit bniah ïa ka Foreign Contribution (Regulation) Amendment Bill, 2026, ban pynlong ïa ki jingïakren bad ki kynhun bapher bapher kiba don bynta ha Shillong.
U Sangma, uba la thung kum u Special Invitee sha kane ka Joint Committee, u la ong ba u la thoh sha u Chairman jong ka committee, uba long u MP Lok Sabha, u Dr Sanjay Jaiswal, halor kane ka bynta.
“Ma nga hi, nga la thoh sha u Chairman jong ka committee ba kan long kaba bha bad kaba suk lada ka committee ka wan sha Shillong bad ïakynduh ïa ki kynhun bapher bapher hangne, khnang ba kan long kaba suk ïa kine ki kynhun ban wan ïakynduh ïa ki dkhot jong ka committee,” la ong u Sangma ha ka Sngi Thohdieng.
U la ong ruh ba ka committee ka dang ïaid katkum ka por ban aiti ïa ka kaiphod shuwa ban kut ka dorbar tlang jong ka Parliament.
“Dang shen, ngi la don ki jingïalang halor ka FCRA, watla ngam long ban iathuh lut kaei kaba la ia kren ha kine ki jingïalang. Hynrei, ka committee ka dang ïakynduh ïa ki kynhun bapher bapher bad ïa bun tylli ki tnad treikam. Nga tharai ba ka jingbynta jong ka ka long ban pyndep ïa baroh ki kam bad ban aiti ïa ka kaiphod shuwa ban kut ka dorbar tlang,” u la ong.
“Ngi sngewthuh ïa ka jingdonkam ban pyndep kloi ïa kane ka kam, bad nga thikna ba hapoh ka jingïalam jong u Dr Jaiswal kum u Chairman, ngin lah ban pyndep ïa ka kamram jong ngi,” la bynrap u Sangma.
La thaw ïa ka Joint Committee ban peit bniah ïa ka FCRA Amendment Bill, 2026, bad mynta ka dang pynlong ïa ki jingïakren bad ki kynhun bapher bapher bad ki tnad treikam.
