SHILLONG : U Chief Executive Member (CEM) jong ka Khasi Hills Autonomous District Council (KHADC), u Bah Winston Tony Lyngdoh, ha ka sngi Balang u la pynpaw ïa ka jingsngewsih halor ka jingkhlad noh jong u dkhot barim ka council bad u nongmihkhmat paidbah, u S Galmendarsingh Lyngdoh.
Ha ka khubor sngewlem kaba la wanrah hapoh ka Council, u CEM u la ong, “Ka Khasi Hills Autonomous District Council ka pynpaw ïa ka jingsngewsih kaba khraw halor ka jingkhlad noh jong u Bah S Galmendarsingh Lyngdoh, bad ka la sngewdei ban buh jingthoh ïa ka jingduhnong jong uwei pat u dkhot barim jong ka House.”
U CEM u la pyntip ba u Lyngdoh u la khlad noh ha ka 22 tarik u Nailar, 2026. U la mihkhmat ïa ka 11-Shella constituency kum u MDC la lai sien, ha u snem 1972, 1979 bad 1984, bad u la shakri ruh kum u Executive Member ha ka por ba u dang long dkhot jong ka Council.
La jied ruh ïa u kum u dkhot jong ka Meghalaya Legislative Assembly ha u snem 1983.
“Kum u dkhot jong ka House bad ka Meghalaya State Assembly, u la noh synñiang shibun bha na ka bynta ka jingroi, ka jingkyntiew bad ka bha ka miat jong ka Council, ka constituency, ka district bad ka Jylla baroh kawei,” la ong u CEM.
Haba phah ïa ka jingsngewlem sha ka ïing ka sem kaba la duh noh ïa u, u CEM u la ong ba ka Council ka ïeng ryngkat bad ka longïing ha kane ka por jong ka jingsngewsih bad ka la duwai ruh na ka bynta ka jingsuk.
