SHILLONG : Ki nonghikai skul Deficit ha ka sngi Balang ki la pynbna ba kin pynjur shuh shuh ïa ka jingïakhih jong ki, da kaba kyntait ïa ka shithi jong ka sorkar kaba la phah ha ka 8 tarik u Risaw, kaba la kam ba la pynbeit ïa ki mat jingdawa jong ki.
U President ka KJDSTA, u Bah Bosswell Pala, u la ong ba ka jingpynlong ïa ka jingshim shuti paidbah kaba lai sngi ka dei namar ka jingbym shimkhia jong ka sorkar, wat hapdeng ka jingdon jong ki jingdawa kiba dei hok bad kiba la sahteng la kumba shi snem.
Haba kren hadien ka jingïalang bishar bniah ha ka sngi kaba ar jong ka jingïakhih, u Bah Pala u la ong ba ki nongïalam na ki skul bapher bapher ki la mynjur lang ba ka sorkar jylla ka pyrshang ban pynbiej bad ban ïalam bakla ïa ki.
“Ka Sorkar Jylla ka pyrshang ban shukor ïa ngi da kaba phah ïa kata ka shithi kaba 8 tarik u Risaw. La phah ïa kane ka shithi sha ki lad pathai khubor. Hadien ba ngi la pule ïa ka shithi, ngi sngew ba ngim hun satia,” la ong u Bah Pala.
U la ong ba ka jingkam jong ka sorkar ba ka jingkhang jong ka jingïakren ka dang plie ka long tang ka ktien khlem dak bad khlem jingshisha.
“Ym don mano mano ruh kiba ïakren ne pynsngewthuh ïa ngi. Kane ka mut ba kam don satia kata ka jingkhot jingïakren kaba ki la kam. Kane ka long ka jingpyrshang ban pynkulmar bad ban pynslem ïa ki mat jingdawa jong ngi,” u la ong.
U Bah Pala u la ong ba ka KJDSTA bad ka Garo Hills Deficit School Teachers and Employees’ Association ki la shah pynbor ban shim ïa ka jingshim shuti paidbah hadien ba ka sorkar kam shym la shimkhia ïa ka jingmaham ba khatduh kaba ki la aiti ha ka jingïalang paidbah jong u bnai Nailur.
U la buh ruh ïa ka jingkylli la u ophisar uba la soi bad phah ïa ka jubab ha ka 8 tarik u Risaw u don ne em ïa ka bor ban jubab ïa ka dorkhas kaba ki la aiti sha u Myntri Rangbah ka Jylla.
