Shillong: Ka Langsning FC kaba bat ruh ia ka nam kum ka lahduh ka la lah ba kan pynliem ia ka Nangkiew Irat da 3-0 bad da kane ka jingjop joit ka la kiew halor duh ka miej iakhein point ka lympung ialehkai Shillong Premier league 2026 ba la long hynne ka nohphai sngi ha SSA Stadium.
Ia kine ki lai tylli ki kol baroh, ka Langsning FC ka la ioh ba kan thep ia ki ha ka kylla miet lyngba u Samuel Phawa (65’), Syed Ahmed (70’) bad Mebanshngain Kurkalang (79’), kaba da kane ka jingjop, ka Langsning ka la ioh ba kan khur 13 point na ki 6 sien ialehkai ba ka la dep, bad tam kylla da ar point ka Mawlai bad Shillong Lajong, katba na ka liang ka Nangkiew Irat kane ka namrem ba kan mad mynta ka sngi, ka pynlong ia ka ha ba kan iai neh ha ka kyrdan ba 8 hadien ba ka la khur 7 point.
Ka kylla step jong kane ka jingiakhun ka long ba ka Nangkiew Irat ka iakhun tyngeh bha bad khlem ailad ia ka Langsning ba kan tehlakam ia ka jingiakhun, pynban haba wan ban bteng pat ia ka kylla miet, ki khnap ki rang ialehkai ki jong ka suki pa suki ki la sdang ban tlot, kaba hangne ka plie lad hi war ia ka Langsning FC ba kan ioh ba kan thep ia kitei baroh lai tylli ki kol.
Ka jingpyrshang ba kham paw na ka Nangkiew Irat ha kane ka jingiakhun ka dei ka jingpyrshang lyngba u Yhoto Lohe, kaba ka bol kam da dei kaba da jam bad kam shim da buh jingman eiei ia u rang ap kol ka Langsning u Rajat Paul Lyngdoh.
Katba na ka liang ka Langsning ki jingpyrshang pynkhih jar ki la mih paw kum na u Kyrmenskhem Mukhim bad na u Richie Kharbani, ha kaba la lah ban kyrda ia ka da u rang ap kol ka Nangkiew Surjay Kumar Pariyar.
Haba wan ban bteng ia ka kylla miet, ki rang ialehkai ka Langsning ki la rai kut ba ka por kam shah shuh ia ki ban shu ialehkai jem jai, pynban marsien ia sdang ki la lah ban kham pynher sted bha ia ka rukom ialehkai ka jong ki, kaba hangne ka la sdang ba kan pynstait ia ki ktang lyer jong ki rang ialehkai ka Nangkiew.
Ka kol ba nyngkong ka Langsning ka wan lyngba u Samuel uba la wan ban mih na ka ben shong (substitute) hadien kane, u Ahmed pat u la ioh ba un head suk ia ka bol kaba la poi hajan jong u bad khatduh u Mebanshngain .
Ka kylla miet hi ka long ba ka Nangkiew ka la shah tam jan ha baroh ki bynta ialehkai ka jong ka ha ka Langsning, hynrei don pat ki khep ba u Wallamsuk Nongkhlaw, u la ioh pat ia ki kato katne ki kabu ban pyrshang pynkhih ia ka jar, hynrei kine kim shim la lah stia ban buh jingma ia ka Langsning.
Lashai ka sngi ka jingiakhun kan long hapdeng ka Rangdajied United FC pyrshah ia ka Nongkseh SSCC kaban long ha ka por 3 baje nohphai sngi.
