Shillong, Nailur 23: Ka jingdon ki MLA jong ka BJP ha Ïingdorbar Thawaiñ ka Meghalaya ka la kiew na ki ar ngut sha ki shiphew ngut mynta hadien ba phra ngut ki MLA jong ka UDP ki la pynïasoh sha ka BJP ha New Delhi ha ka sngi Balang.
Ka jingpynïasoh jong ki la long ha ka jingïadonlang u Myntri ka Sorkar Pdeng, Bah Kiren Rijiju, bad u President ka BJP Meghalaya, Bah Rikman G Momin.
Kitei ki MLA kiba la pynïasoh ki kynthup ïa u Myntri Sorkar, Bah Lahkmen Rymbui, MLA ka Amlarem, nangta u Bah Kyrmen Shylla, MLA ka Khliehriat, Bah Mathew Beyondstar Kurbah (Mawphlang), Bah Synshar Kupar Roy Lyngdoh Thabah (Sohiong), Bah Balajied Kupar Synrem (Shella), Bah Mayralborn Syiem (Nongpoh), Bah Pius Marwein (Ranikor) bad Bah Olan Sing Suin na Mawsynram Constituency.
Haba kren na ka bynta jong ki MLA kiba la pynïasoh sha ka BJP, u Bah Lahkmen Rymbui u la ong ba ka jingïakren bad ki nongïalam jong ka BJP ha Delhi ka la ïaid mynta la katto katne por, bad ka jingïalam jong ka party ha ka kyrdan ba hakhlieh ka la ai ka jubab kaba pynkmen halor ki mat kiba kongsan jong ka jylla.
“Ka sngi mynta ka long kaba kongsan bha ïa baroh. Ka jingïakren ka la ïaid mynta la katto katne por. Kumba phi ïohi, ki don ki MLA kiba dang samla bad ki don ïa ki jingangnud bad ki kwah ban noh synñiang sha ka imlang sahlang,” u la ong.
U Bah Rymbui u la kdew ïa saw tylli ki mat kiba ki MLA ki kwah ban pynïaid shakhmat, kata ka jingpynrung ïa ka Ktien Khasi hapoh ka Khyrnit ba Phra, ka jingpynbeit ïa ka MRSSA ban tehlakam ïa ka jingwanrung briew na shabar, ka jingpynsuk ïa ki kyndon kiba ïadei bad ka kam tih dewiong, bad ka jingpynkynriah ïa ka Harijan Colony na Them Iew Mawlong.
U la ong ba ka jingïalam jong ka Sorkar Pdeng ka la pynpaw ïa ka jingkyrmen halor kine ki mat bad kan shim ïa ki sienjam ha ka por kaba dei.
“Baroh kine ki mat, na ki nongïalam ha Delhi ka la ai ka jubab kaba pynkmen. Kin shim ïa ki sienjam ha ka por kaba dei. Dei na kata ka daw ba ngi don hangne mynta ban pynïasoh sha ka party,” u la ong.
U Bah Rymbui u la bynrap ba namar ka jubab kaba bha kaba ki la ïoh na ki nongïalam ka BJP, ki la rai ban pynïasoh sha ka party bad u la kyntu ïa ki paidbah ka jylla ban ai jingïatreilang ïa ki.
Ki nongïalam ka BJP ki la ong ba ka jingpynïasoh jong kine ki phra ngut ki MLA kan pynkhlaiñ shuh shuh ïa ka NDA ha Meghalaya bad kan pynsuk ïa ka Sorkar Pdeng ban shimkhia ïa ki mat jong ka jylla kiba dang ap ïa ka jingpynbeit.
Ki nongïalam ka party ki la ong ba da kane ka jingpynïasoh, ka jingdon ki MLA kiba kyrshan ïa ka NDA ha Meghalaya ka la nangkiew.
Haba kren halor ki saw tylli ki mat kiba ki MLA ki la buh, u nongïalam ka BJP u la kdew ïa ka jingpynrung ïa ka ktien Khasi, ka MRSSA, ka mat tih dewiong bad ka jingpynkynriah ïa kito kiba sah na Them Iew Mawlong.
U la ong ba ka jingïakren halor ka mat jong ka Harijan Colony ka dang ïaid bad ka Ministry of Defence, bad u la pynpaw ïa ka jingsngewskhem ba kine ki mat kin ïoh ïa ka jingpynbeit hapoh ka jingïalam jong u Myntri Rangbahduh Narendra Modi bad u Myntri Rangbah ka Meghalaya.
