SHILLONG : Ka Nongkseh SSCC ka la lah ba kan pynliem ia ka Rangdajied United FC da 2-0 ha ka Shillong Premier League 2026 ka Shillong Sports Association, ba la long hynne ka nohphai sngi ha SSA Stadium, Polo.
Da kane ka jingjop, kan pynlong syndon ia kane ka kynhun ba kan lap dien trai biang ban iakhun sha ka thong jong ka jingiaknieh rah ia ka nam lahduh jong kane ka lympung.
Da kane ka jingjop ba hynne ka sngi, ka Nongkseh SSCC ka la ioh ba kan khur 10 point bad duna lai point ia ka Langsning FC kaba bat ia ka kyrdan ba halor duh, katba na ka liang ka Rangdajied ka jingshah rem noh na ka jingiakhun ba mynne kan pynlong ia ka ba kan iai neh ha ka kyrdan ba hynniew hadien ba ka la ioh ba kan khur shwa tang 7 point.
Ia ki artylli ki kol ka Nongkseh SSCC la thep ia ki lyngba u Dawanchwa Challam (66’) bad Aenam Jyrwa (85’).
Hynrei haba phai pat sha ka jingiakhun, kampher wat lada ka Rangdajied ki la mad ia ka nam rem, hynrei u sawar jong ka nam ialehkai ba bha ka la noh sha sha kane ka kynhun, kaba ka jingshah thep ba syndet jong kine ki artylli ki kol, ki wan hapdeng ki sekon bad minit kaba ki khynnah ialehkai ki jong ka, ki la ieng iakhun bad khlem shah jem satia.
Ka kylla step ka long ba dei ki khynnah ka Rangdajied kiba la lah ban ialehkai bha, da ka jinglah ban ia bat bha ia ka bor bad ruh ban iarap ban pynbuh sha ki para ba ialehkai lang, nalor katta kim shim la aili ne ailad da kaba suk ia ki rang ialehkai jong ka Nongkseh ba kin ban bat slem ka bol ha ki kjat ki jong ki, da kaba ki tur, ki tynrah bad ialeh ban knieh beit ia ka bol.
Ka jingpyrshang kja Nongkseh ban pynkhih jar ha ka kylla step ka mih paw lyngba u Chesterpaul bad kumjuh ka freekick lyngba u Hardy Cliff Nongbri, katba na ka liang ka Rangdajied ki la ioh ia ki kabu ba kin shut ia ki corner, ia kaba kim shim la lah ban shna pynwandur bha ia ki ban lah ban pynkhih ia ka jar.
Hadien ba la shah tam shakhmat da ar kol ruh, ki khynnah ka Rangdajied ki iai bteng ban aiti shisha met bad mynsiem hapdeng ka madan iakhun bad ha ka minit ba 79 u Micky Marwein u la lah ban pynbuh ia ka bol sha u Balamlynti Khongjee hynrei ha ka por ba u ioh ba un head ka bol ka her pynban shabar, hadien kane u later Franky Dkhar u la shut jam bha ia ka freekick shabar jong ka box kaba hangne ruh ka bol ka la poi shabar .
Ha ka khyllipmat ba ka jingiakhun kan khreh jam noh sha kaba kut u Henryford Nongneng u la ioh ban shut jam bha ia ka bol, kaba pynlong ia u rang ap kol ka Nongkseh u Daraphun Talang ban pynsting ia la met ban pyntikna ba kan nym buh jingman sha ka kol.
Kumban shu pynpaw ba shwa kane ka jingiakhun, ka Rangdajied ka la lah ba kan khur ia ki artylli ki nam jop pyrshah ia ka Laitkor bad ia ka Nangkiew Irat, kaba hynne pat ka sngi kum ka kynhun ka duna bad tlot bha shakhmat, kaba pynlong syndon ia ki ba ym tang ba kin mad ia ka nam rem hynrei ba kin wanphai khlem da lah satia ban ioh ban thep wat tang kawei ruh ka kol
Lashai pat ka sngi, ka kynhun ba don ha ka kyrdan kaba lai ka Shillong Lajong FC kan mih madan ban aireng pyrshah ia ka kynhun kaba don ka jingma ba lah ban hiar noh na kane ka lympung ka Laitkor SC kaban long ha ka por 3 baje nohphai sngi.
