Shillong, Nailur 23: Ka United Democratic Party (UDP) ha ka sngi Balang ka la pynbna ba ka la sospon ïa ki lai ngut ki MLA jong ka party, kiba long napdeng ki phra ngut ki MLA kiba la pynïasoh sha ka BJP ha New Delhi ha kane ka sngi Balang.
Kane ka rai ka la wan hadien ba ka State Parliamentary Board jong ka UDP kaba long ha ka sngi Balang, hapoh ka jingïalam jong u President ka party, u Bah Metbah Lyngdoh.
Na ka liang u President u la ong ba ka party ka la phah ïa ka show-cause notice sha kitei ki lai ngut ki MLA, hadien ba ki la pynbna paidbah ba ki la pynïasoh sha kawei pat ka seng saiñpyrthei.
Shuh shuh u la ong ba ka party ka la ai por ïa ki haduh ka sngi Balang ban wan mih ha khmat ka State Parliamentary Board ban ai ïa ka jingpynshai, ne ban phah ïa ka jubab da ka jingthoh.
Hynrei la iathuh pat ba ym don uwei ruh napdeng kitei ki lai ngut uba la jubab ïa ka show-cause notice.
Kumta, ka UDP ka la shim ïa ka rai ban sospon ïa kitei ki lai ngut ki MLA haduh ban da pynbna pat da ka rai kaba thymmai.
Kitei ki MLA ki kynthup ia u Bah Olan Sing Suin, MLA ka Mawsynram; u Bah Kyrmen Shylla, MLA ka Khliehriat; bad u Bah Mathew Beyondstar Kurbah, MLA ka Mawphlang.
U Bah Metbah Lyngdoh u la ong ba ka hukum ban sospon ïa kitei ki MLA la phah da ka jingthoh. U la ong ruh ba ka party kan sa rai ïa ka sienjam kaba bud bad kan pynbna ïa kata ha ka por kaba dei.
