Shillong: Ka Shillong Lajong FC ka la lah ba kan kynjoh pat sha ka kyrdan ba nyngkong ka miej iakhein point ka lympung ialehkai Phutbol Shillong Premier League 2026 bad kane ka la wan hadien ba ka la lah ba kan pynliem da 3-0 ia ka Laitkor SC, ha ka jingiakhun ba la long hynne ka nohphai sngi ha SSA Stadium, Polo.
Ia kine ki lai tylli ki kol ka Shillong Lajong FC la thep ia ki da u Freddy Jyrwa (27’), Rimankhraw Kharumnuid (63’) bad sa shi kol kaba wan ha ka dur ka penalty la thep ia ka da u Iohborlang L Lyngkhoi (77’).
Kumta da kane ka jingjop, ka pynlong iaka Shillong Lajong FC ba kan ioh khur 14 point na ki 7 sien ialehkai ba ka la dep, katba ka kynhun ba don ha ka kyrdan kaba ar dei ka Langsning FC kaba la khur 13 point, hynrei ka kabu ksiar ia kane ka kynhun pat ka long ba ka don tam jingiakhun, katba ka kyrdan kaba lai la bat ia ka mynta da ka kynhun ialehkai ka Mawlai SC.
Haba phai sha ka kynhun ialehkai ka Laitkor, kane kan dei ka sien kaba lai ba kan mad ia ka nam rem hakhmat ka Shillong Lajong ha ki jingiakhun ba ki la ia kynduh ha madan ha ki snem ba la dep, bad ia ka jingiakhun kaba mynta ka sngi pat ka dei ba la bynrap da ka jinglah ban shan skhem bha triang da ki rang ba ialehkai dien ka Shillong Lajong.
Naka bynta ka Lajong wat la ka hap ba kan iakhun pyrshah ia ka kynhun kaba tang kum ia ka Laitkor, hynrei naduh kaba sdang, ki khynnah ialehkai ki jong ka, ki la kut jingmut triang ban nym khein sting, ban nym shah jem ne ailad ia ka Laitkor ba kan ialehkai da kaba suk.
Hynrei haba wan ban bteng ia ka kylla miet, mih paw kawei ka jingpyrshang kaba kham I bang bha na ka Laitkor, ha kaba u Wadskhem Marbaniang u la shimti beit halade ban khyrwit jam bha ia ka bol sha ka kol ka Lajong kaba la lah ban ioh kem noh ia ka da u Lakpa Lama ba dei u nongap kol ka Lajong, hadien kato katne minit mih bluit sa ka counter attack ba itynnad bha na ka Laitkor, kaba hangne u Shaipharlin Nongsiej uba la ioh ban rah shajan ka kut ka kol ka Lajong pynban ha kaba kut I kumba dum jingmut aiu ban leh pat ia ka, hynrei ban shu poi shut beit sha uwei na ki defender ka Lajong ha ka jingpyrshang ban pynkhih ia ka jar.
Lashai pat ka sngi ka jingiakhun kan long hapdeng ka kynhun ba bat ha ka kyrdan kaba 8 ka Nangkiew Irat pyrshah ia ka Mawlai SC, kaban long ha ka por 3 baje nohphai sngi.
Ka Mawlai SC kan rung sha kane ka jingiakhun kum ka kynhun bym pat shim la shah rem ha kane ka samoi ialehkai ba mynta ka SPL bad ka jingjop beit beit kan pynpoi biang pat ia ka sha ka kyrdan ba nyngkong ka miej iakhein point, namar ka jingiapher ka jong ka bad ka Shillong Lajong ka long ha ka jingiathep kol (goal difference) kaba long da +7 la +4.
