Shillong : U Superintendent of Police (SP) ka East Khasi Hills u Bah Vivek Syiem, u la kynthoh jur halor ka jingphriang ki video AI kiba ktah jur ia ka burom jong u bad kumjuh ia u Symbud Myntri Rangbah ka Jylla, Bah Prestone Tynsong.
“Ha kane ka juk AI, bun bha ki memes ki shna. Ngin sa peit kumno ngin leh ia kine,” ong u SP haba kren bad ki lad pathai khubor.
U SP u la pynshai ba ka tnat pulit kam shym la ai jingbit ne pynshlur ia kino kino ki kam kiba beaiñ.
U la ong ruh ba lada don ki briew kiba lum pisa beaiñ, ka dei ban long ka bynta jong ki paidbah ban ujor da ka ejahar pyrshah ia kine ki briew, ym ban pynsaphriang tang ki memes ne kynnoh ia baroh ka tnat pulit.
“Ym dei ban shu thaw memes ne kynnoh ia baroh ka tnat pulit. Ki paidbah ki dei ban ujor da ka ejahar pyrshah ia kiba lum pisa beaiñ,” la bynrap biang u SP.
Ha kaba kren shaphang ka tnat pulit, u Bah Vivek u la ong ba ha East Khasi Hills don kumba 2,500 ngut ki pulit ha ka tnat. Kumta, u la ong ba lada don katto katne kiba leh bakla, kata kam mut ba baroh ki pulit ki long kumjuh.
“Ngi lah ban don ki briew kiba leh bakla, hynrei kata kam mut ba baroh ka tnat pulit ka long kumjuh,” u la ong.
