Shillong, Risaw 01 : Ha ka sienjam kaba pynsuk ïa ki nongthep vote, ka Election Commission of India ka la rai ba ki nongthep vote kiba don jingthut ha ka Special Intensive Revision (SIR) 2026 kim donkam shuh ban leit sha ki ophis treikam ka tnad election na ka bynta ka jingbishar, ong u Chief Electoral Officer (CEO) ka Meghalaya, u Dr. BDR Tiwari, ha ka Sngi Palei.
“Ki Booth Level Officers (BLOs) kin leit sha ki ïing jong ki nongthep vote kiba la ïoh ïa ki jingpyntip namar bym lah ban pynïasoh ïa ki jingtip lane namar ki jingïapher ha ki jingtip kiba donkam ban pynshai. Kin lum ïa ki kot ki sla kiba donkam bad buh ïa ki ha ka ECINet khnang ba u Electoral Registration Officer (ERO) ba dei khmih un lah ban shim rai,” la ong u CEO
Nangta la ong, “Kine ki nongthep vote kim donkam ban leit sha ka ophis jong u ERO/AERO na ka bynta ka jingbishar. Tang ha ki khep kiba kyrpang, katkum ka rai jong u ERO, yn donkam ban pynlong ïa ka jingbishar, bad lada lah, yn pynlong ïa kane lyngba ka online.”
U la bynrap ba lada donkam ban pynlong ïa ka jingbishar, u nongthep vote u lah ban ai bor ïa uno uno u dkhot jong ka ïing ban leit mihkhmat ha ka jaka jong u. Katba ki District Election Officers (DEOs) kin sa buh ïa ki Help Desk bad ki Special Camps na ka bynta ki briew kiba sah ha ki jaka sah ba shipor, ki nongbylla, ki briew kiba duk bad kiba bym don jaka sah.
Ha kajuh ka por u CEO u la ong ruh ba ka Commission ka la pynjlan ïa ka tarik ban pynmih ïa ka thup kyrpang kaba khatduh sha ka 26 tarik u Risaw.
Haba kren halor ka jingkiew shaphrang jong ka kam, u la ong ba ka Meghalaya ka la pyndep ïa 6,06,939 na ki 6,51,735 tylli ki jingpyntip haduh ka 1 tarik u Risaw, kaba long 93.13 percent.
Napdeng baroh 21,69,243 ngut ki nongthep vote kiba don ha ka draft electoral roll, la pynmih ïa ki jingpyntip na ka bynta 6,51,735 ngut. Napdeng kine, 2,22,786 ki dei ki khep bym don jingpynïasoh ïa ki jingtip (No Mapping), katba 4,28,949 ki dei ki khep kiba don ki jingïapher ha ki jingtip.
La iathuh ba haduh mynta, la shem ba 1,194 ngut ki nongthep vote kim biang ban long ki nongthep vote, katba 19,71,723 ngut la buh na ka bynta ka jingpynmih ïa ka thup kyrpang kaba khatduh.
Ha kane ka jingpynbeit thymmai ïa ka thup nongthep vote, la dep ban buh ha ka rukom digital ïa 23,259 tylli ki form. Napdeng kine, 12,624 ki dei ki Form 6, 1,616 ki Form 7, 1,590 ki Form 8 na ka bynta ka jingkynriah jaka sah bad 7,429 ki Form 8 na ka bynta ka jingpynbeit ïa ki jingbakla ha ki jingtip. La pynïasoh ruh ïa 1,814 ngut ki Booth Level Agents (BLAs) ha kylleng ka jylla.
“Ym dei ban ieh ïa uno uno u nongthep vote uba biang katkum ka aiñ. To ïatreilang bad u BLO jong phi bad ai ïa ki kot ki sla kiba donkam,” la kyntu u Tiwari.
