SHILLONG : U Myntri Rangbah ka Jylla, Conrad K Sangma, ha ka sngi Ba-ar u la kyntait ïa ki khubor ïathuh khlem nongrim ba ka NPP kan pynmih noh ïa ka BJP na ka Meghalaya Democratic Alliance (MDA), bad ba ka BJP ka pyrshang ban pynpra ïa ka NPP khnang ban thaw ïa ka sorkar jong ka hi.
Ha kajuh ka por u la pynshai ruh ba ym don kano kano ka jingïakren ban pynrung myntri ïa ki 8 ngut ki MLA kiba dang shen ki la leit pynïasoh sha ka BJP.
U Conrad Sangma u la ong ba kine ki ar tylli ki khubor ki long “bakla bha bad khlem nongrim.” U la pynkynmaw ba watla ka NPP ka don ka jingbun paid kaba skhem da ki 33 ngut ki MLA, kam shym la weng ïa ki paralok ba don bynta ha ka sorkar jingïatreilang ha ka por ba la pynkylla ïa ka kynhun myntri dang shen.
“Ka NPP ka la ïoh ïa ka jingbun paid kaba pura da ki 33 ngut ki MLA. Lada ngi kwah, ngi lah ban weng ïa ki paralok ba ïatreilang ha ka por ba la pynkylla ïa ka kynhun myntri. Hynrei kum ka sorkar ba ïatreilang, bad kum ka seng saiñpyrthei ruh, ngi long kiba shai bha halor ki nongrim kiba ngi la tei ïa kane ka kynhun synrop. Kawei na kine ki nongrim ka long ban ïatreilang,” u la ong.
U la pynshai ba watla ki nombor jong ki MLA ne ka bynta jong ki seng bapher bapher ha ka Cabinet ka lah ban kylla, hynrei ka nongrim jong ka jingïatreilang kan ym kylla.
“Ki nombor ki lah ban kylla hangne bad hangtai. Ka jingïashim bynta ha ka Cabinet ruh ka lah ban kiew ne hiar. Hynrei ka mynsiem jong ka jingïatreilang bad ban ym iehnoh ïa ki paralok tang namar ba ngi la ïoh ïa ki nombor kiba biang, kam dei ka rukom kaba ngi leh ha ka saiñpyrthei,” u la bynrap.
U Myntri Rangbah u la ong ruh ba baroh ki seng kiba ïatreilang ha ka MDA ki la pynskhem biang ïa ka rai jong ki ban bteng ïa ka jingïatreilang. U la ong ba u la ïakren bad ki nongïalam jong baroh ki seng kiba don bynta ha ka kynhun synrop, bad baroh ki la mynjur ban bteng ïa ka jingïatreilang.
Hynrei, u la pdiang ba ki don ki jingïakynduh hapoh ki seng saiñpyrthei bapher bapher, kiba la ïalam sha ka jingkylla seng jong katto katne ngut ki MLA na kawei ka seng kaba don ha ka kynhun synrop sha kawei pat.
Haba kylli halor ka jingpynkylla ia ka kynhun myntri bad la ka sorkar ka thmu ban pynrung myntri ïa ki 8 ngut ki MLA kiba dang shen ki la leit sha ka BJP, u Sangma u la ong ba ym don satia kano kano ka jingïakren halor kane.
“Ym don jingïakren halor kane bad ym don ruh kano kano ka jingthmu ban pynrung kum ki Myntri ïa kino kino na ki MLA kiba dang shen ki la leit pynïasoh sha ka BJP.”
U la pynpaw shai ruh ba ym shym la don jingïakren halor kane naduh kaba sdang, bad ym shym la don jingïakren wat hadien ba kine ki MLA ki la pynïasoh sha ka BJP.
Haba kylli la ka jingkynriah jong 8 ngut ki MLA ka UDP sha ka BJP ka pyni ïa ka jingbym ïahap hapoh ka jingïatreilang jong ka sorkar, u Myntri Rangbah u la kyntait jur ïa kane.
“Em, satia. Lada kine ki MLA ki la leit sha kano kano ka seng kaba shabar jong ka kynhun synrop bad pynïasoh sha ki seng liang pyrshah, lah ban don ka daw ban pyrkhat ba don ka jingbym shaniah ne ki jingeh hapoh ka kynhun synrop. Hynrei kane ka jingkynriah ka long na kawei ka seng kaba don hapoh ka kynhun synrop sha kawei pat ka seng kaba dang don hapoh kajuh ka kynhun. Kumta, ka jingkylli shaphang ka jingbym shaniah kam mih,” u la ong.
