Shillong, Risaw 01 : U Superintendent of Police (SP) ka East Khasi Hills, Bah Vivek Syiem u la hukum ban pynlong ïa ka jingtohkit kaba bniah hadien ba ka Khasi Students’ Union (KSU) ka la ring dur ïa ka jingsuba ba don ka jingdawa pisa beaiñ na ki nongñiah trok ha ki bynta jong ka Mawkhanu bad Thangshalai.
La kynnoh ba la pynbor ïa ki nongñiah trok ban siew pisa haduh T.200 haduh T.500 ha ki kynja sem kaba la kynnoh ba don ruh ki pulit.
Haba kren halor ki video ba la saphriang paidbah ha ki khubor social media, u SP u la ong, “Hynin ka sngi mar ia tip shaphang kine ki video ha ki social media ba ka KSU ka la pynlong ïa ka jingleit khynra da kaba kynnoh ba don ka jinglum pisa beaiñ, nga la phah mardor ïa u SP City, Dangsan Khyriem ha kaba la dep ruh ia ka jingtihkit ha ka kylla ba nyngkong.”
U la iathuh ba ki pulit langrut kiba la buh ha kitei ki kynja iing ki dei ban pynlong ïa ka jingpahara bad pynthikna ïa ka jingshngaiñ jong ki trok naduh janmiet haduh mynmiet, katkum ka jingkyrpad jong ka kynhun ki nongñiah trok namar ka jingjur jong ki kam tuh bad lute.
Hynrei, u SP u la phla ba don ki jingbym biang ha ka rukom treikam.
“Katkum ka jingpeit ïa kine ki video, ha kaba ki nongñiah trok ki la leit ban ai pisa ha kawei ka sem, kam don satia ka jingpeit bniah ne ka jingdon jong ki pulit ha kito ki jaka. Lada phi peit ïa ka rukom peit bniah jong ki pulit ha Shillong, ka long kaba shai bad kaba khuid, ki da don bad ki tiar siat bad ki tiar jingïada bad ki tiar khang kali (nakas) kiba biang,” u la ong.
U SP u la pynbna ba ïa ki constable kiba donkti ha katei ka kam yn sospon shipor na ka kam khnang ban pynthikna ïa ka jingkhuid bad ka jinglong laitluid jong ka jingtohkit.
U la ong ruh ba ka transfer committee jong ka district kan shim rai halor ka jingpynkynriah ïa u Officer-in-Charge (OC) jong katei ka thaiñ.
Haba ban jur halor ka jingbym ailad satia ïa kino kino ki kam bym dei, u SP u la ong, “Nga kwah ban kyntu ïa baroh ki nongñiah trok ba kim dei ban siew pisa sha uno uno u pulit uba don ha surok hapoh ka district jong nga ha East Khasi Hills, bad ha kano kano ka jaka ruh.”
U la ong ba ki nongñiah trok kiba shah dawa pisa ha ki pulit ne ki briew kiba nabar jong ka sorkar, ki lah ban phone sha ka police control room number, da kaba ñion ïa u number emergency 112, ne ban ai da ka jingujor da ka jingthoh sha ka ophis jong u SP.
