Shillong : Ki pulit ka West Jaintia Hills District ki la pynmih ïa ka rukom pyndonkam da ka QR Code kaba ai lad ïa ki paidbah ban pyntip khlem pynpaw kyrteng shaphang kino kino ki kam be-aiñ ne ki kam runar ha ka thaiñ.
Ka jingthmu jong kane ka sienjam ka long ban pynsuk ïa ki paidbah ban pyntip sha ki Pulit, bad ha kajuh ka por ban pynthikna ba ka jingtip jong ki nongpyntip kan long buhrieh.
Ha ka kyrwoh ba la pyllait da u Superintendent of Police, West Jaintia Hills ha ka Sngi Balang, la ong ba ka QR Code kan ai lad ïa ki paidbah ban pyntip shaphang ki kam be-aiñ ne kam runar, ka jingwan rung be-aiñ jong ki nongwei, ka jingbakla ne jingle bym dei rukom jong ki Pulit, ne kino kino kiwei pat ki mat kiba donkam ïa ka jingpynbeit jong ki Pulit.
Ka tnat Pulit ka la kyntu ïa ki paidbah ban pyndonkam ïa kane ka lad khlem jingsheptieng ba yn pynpaw ïa ka kyrteng ne ka jingtip shaphang jong ki.
“Ïa ki paidbah la kyntu ban scan bad pyndonkam ïa ka QR Code ban phah ïa ki jingtip ne ki jingujor khlem da pynpaw kyrteng. Ka kyrteng bad ka jingtip shaphang u nongpyntip yn buhrieh,” la ong u SP.
U SP u la ong ruh ba ka jingïatreilang jong ki paidbah ka long kaba donkam ban pynneh ïa ka shongsuk shongsain bad ban pynthikna ïa ka jinglong shngaiñ jong baroh.
“Ka jingïatreilang jong ki paidbah ka long kaba donkam ban pynneh ïa ka shongsuk shongsain bad ban pynthikna ïa ka jinglong shngaiñ bad jingsuk ïa baroh,” u la bynrap.
