SHILLONG : Ka rilum Garo kan hap ban ap sa kham slem ïa ka ilekshon jong ka Garo Hills Autonomous District Council (GHADC), hadien ba ka Kynhun Myntri ha ka Sngi Balang ka la mynjur ban pynjlan biang da hynriew bnai ïa ka samoi treikam jong ka Council.
Ka jingpynjlan kaba mynta kan sdang hadien ba ka jingpynjlan kaba nyngkong kan kut ha ka 17 tarik Risaw. Katkum ka aiñ, ka samoi treikam jong ka GHADC lah ban pynjlan haduh shi snem.
Haba kren hadien ka jingïalang jong ka Cabinet kaba la pynïaid da u Myntri Rangbah Conrad K Sangma, u nongaiktien jong ka MDA bad Myntri ka sorkar, u Bah Wailadmiki Shylla, u la ong ba ka ilekshon ym lah ban pynlong mynshwa namar ka jingdon ka jingthut ha ka suk ka sain ha rilum Garo.
U la ong ba ka jingpynslem mynta ka dei namar ka jingïadei bad ka delimitation bad SIR, kiba dang ïaid shakhmat.
“Ka don ka bynta ha ka aiñ kaba shah ïa ngi ban pynjlan ïa ka samoi treikam baroh lang haduh shi snem, kata hynriew bnai plus hynriew bnai. Namar ba ka delimitation ka dang ïaid bad kan sa dep noh shen, ka Cabinet ka la mynjur ban pynjlan biang sa hynriew bnai,” u la ong.
U Myntri u la pynpaw ka jingkyrmen ba hapoh kine ki hynriew bnai yn lah ban pyndep ïa ka ilekshon GHADC.
