SHILLONG : U Nongïalam ka Liang Pyrshah, Dr. Mukul Sangma, ha ka sngi Palei, u la ther tyngeh ïa ka BJP, da kaba kynnoh ba kane ka seng ka pyndonkam da ka rukom ai jingkular ban khring ïa ki phra ngut ki MLA barim ka UDP ban pynïasoh sha ka BJP, hashwa ka elekshon MLA ha u snem 2028.
U Sangma u la ong ba ki jingkular ka BJP halor ka jingplie biang ïa ka kam tih dewiong bad kiwei ki mat ki long tang ka jingpynkynmaw biang ïa ki jingkular kiba ka BJP kam shym la lah ban pyntreikam ha u snem 2018.
“Haba ïadei bad ka kam tih dewiong, ha u snem 2018 ki la ong ba yn sdang biang hapoh hynriew bnai. Hato kam long shisha kumta? Ki nongïalam ka BJP, kynthup ïa u General Secretary uba peit ïa ka Meghalaya, ki la ai jingkren bunsien ha ka por elekshon 2018, kumba kin leh ïa ki kam kiba phylla. Hynrei, to peit, la shu pynbiej ïa ki paidbah,” la ong u Sangma.
U la bynrap, “Ki jingkular jong ki bad ka jingbym lah ban pyntreikam ïa kine ki jingkular ka pyni ba ki la lamler. Haba phi kular ban leh ïa kaei kaei hynrei phim pyntreikam, kata ka mut ba ka jingkular ka long kaba lamler. Kumta, ki la long ki nonglamler.”
U la ong ba kine ki MLA kiba la kylla seng mynta ki pyrshang ban pynshai sha ki paidbah da kaba pyni ïa ka BJP kum ka seng kaba wan ban pynim ïa ka kam tih dewiong.
“Mynta ki pyrshang ban pynsngewthuh ïa ki paidbah ba kynsan kynsan ki la kylla long ki nongpynim kiba kwah ban pynsted ïa ka kam tih dewiong. Nga sngewsih ban ong ba kane ka long tang ka jingpyrshang ban pynksan ïa ka jingkylla seng jong ki. Ki la long kiba shah khring da ki jingkular ban pynïasoh sha kawei pat ka seng. Hooid, ki la shah khring, hynrei kim shym la leit na ka bynta ka bha ka miat jong ki paidbah lane ban pynsuk ïa ka kam tih dewiong,” la ong u Sangma.
Haba kynnoh ba ka BJP ka pyndonkam bakla ïa ka bor jong ka ha Delhi ban khring ïa ki nongïalam saiñ pyrthei, u nongïalam ka TMC u la ong, “Ka BJP ka pyndonkam ïa ka bor jong ka ha Delhi ban khring ïa ki nongïalam da kaba ai jingkular, da kaba ong ba kin leh ïa kane bad kata. Ym tang ka kam tih dewiong, hynrei ki don ruh kiwei ki mat. Balei?”
U la ban jur ba dei ban pynkut ïa kane ka rukom ïatreilang ha ka saiñ pyrthei kaba don ka jingai bad shim jingïarap na ka bynta ki jingmyntoi shimet.
U Dr. Mukul u la pynkynmaw ruh ba ka pisa bad ki jingdon jingem kiba wan na ka Sorkar Pdeng sha ka Jylla ki dei ki hok katkum ka Riti Synshar ka Ri, ym dei ki jingïarap kiba ka party kaba bat ïa ka bor ha Delhi ka ai katba mon.
“Ka pisa ne kino kino ki jingdon jingem kiba wan sha ka Jylla ki dei ki hok jong ka Jylla katkum ki kyndon jong ka Riti Synshar ka Ri. Ngim dei ki nongkhrongpan jingïarap. Ka Riti Synshar ka Ri ka la buh shai bha ïa ka bynta jong ka bor bad ki jingdon jingem kiba dei ban ïoh da ka Jylla. Kaei kaba dei hok ïa ka Jylla, ym don kano kano ka Sorkar India kaba lah ban khang noh. Hato kine ki MLA kim tip ïa kane?” u la kylli.
U Dr. Mukul Sangma u la bynrap ba ki nongïalam saiñ pyrthei kim dei ban pynbiej ïa ki paidbah tang ban pynksan ïa ka jingkylla seng jong ki.
