Shillong : : Hynniew bnai hadien ba ka Meghalaya Human Rights Commission (MHRC) ka la pdiang ïa ka jingujor halor ka jingpynkheiñ hok briew, ka MHRC ha ka sngi Ba-ar ka la khot ïa ki nongshong shnong jong ka shnong Daistong ban ai jingpynshisha ha khmat ka Commission halor ki jingkynnoh ba la khanglad ïa ki briew ha ka jingïalang paidbah halor ka Shree Cement ha u Nohprah jong u snem ba la dep.
Ïa ka jingujor la ujor ha ka 9 tarik u Rymphang halor ka jingïalang paidbah kaba la long ha Daistong ha ka 19 tarik u Nohprah, 2025.
Haba kren ha ka kyrteng jong ki nongshong shnong hadien ba ki la mih ha khmat ka Commission, u nongtrei mon sngewbha Bah Reachingson Siangshai, u la ong ba ka MHRC ka la shahpynsngew ïa kane ka mat haduh 7-8 sien naduh ka 10 tarik u Rymphang.
“Mynta ka sngi ka long ka sien banyngkong ba ki la khot ïa ngi ban wan mih hi. Mynta ngi dang ap ïa ka rai,” u Siangshai u la ong.
Ki nongshong shnong ki la kynnoh ba ka jingwan rung paidbah sha ka jingïalang la khanglad ha ki ar tylli ki jaka — kawei shuwa ban poi sha Daistong, ha kaba ki nongshong shnong hi la shah khang, bad kawei pat ha kaba ïa ki kynhun NGO bad ki paidbah la khang ban poi sha ka jaka pynlong jingïalang.
“Bun na kito kiba khanglad ïa ki briew ki la tap dur, kumba phi la iohi ha ki lad pathai khubor,” la kynnoh u Bah Siangshai.
U la ong ba ka Commission ka la pyntip ha ki ba kan pynmih ïa ka hukum.
“Ka Commission ka la pyntip ba kan pynmih ïa ka hukum bad ngi dang ap. Ngim tip la kan long hadien shi sngi, shi taïew ne shi bnai. Ki paidbah Daistong ki la kdew lut ïa kiei kiei baroh ha ka petition. Mynta ka kam ka la shong ha ka MHRC,” u la ong.
