SHILLONG : Baorh ki restaurant, hotel, bakery bad ki dukan die jingbam ha Meghalaya ki la ïoh por 30 sngi ban pynbiang ïa ka jingbthah jong ka Sorkar ban pyni ïa u number licence ne registration jong ka Food Safety and Standards Authority of India (FSSAI) ha ki bill, ki receipt bad ki menu.
Ka Commissionerate of Food Safety, Meghalaya, ka la bthah ïa baroh ki Food Business Operators (FBOs) ha ka Jylla ba ki dei ban thoh bad pyni ïa u number FSSAI uba don 14 tylli ki dak ha ki kot ki sla bad ki jingthoh kiba ki nongthied ki ïoh ne ki pyndonkam, kynthup ïa ki cash receipt, invoice, cash memo bad ki menu kiba la shon ne kiba don ha ki digital platform.
Ïa kane ka hukum la pynmih ha ka Lah Sngi U Blei da u Commissioner (Food Safety), u Dr Joram Beda, IAS. Ka hukum ka kynthup ïa ki jaka shna jingbam, ki jaka pynkhreh doh bad dud, ki restaurant, hotel, bakery, ki nongdie marbam ha ka wholesale bad retail, ki distributor, ki dukan grocery bad ki Self Help Group kiba trei ha ka kam pynkhreh jingbam.
Ka tnad ka la pynshong nongrim ïa kane ka jingbthah ha ka hukum jong ka FSSAI kaba la pynmih ha ka 13 tarik u Nailur, 2022, bad ka jingbthah jong ka Central Consumer Protection Authority (CCPA) hapoh ka Consumer Protection Act, 2019.
Katkum ka tnad, ka jingbym pyni ïa u number licence ka long ka jingpynkheiñ ïa ki Food Safety and Standards (Licensing and Registration) Regulations, 2011. Kane ka lah ruh ban kheiñ kum ka “unfair trade practice” hapoh ka Section 2(47) jong ka Consumer Protection Act, namar ba ki nongthied kim ïoh lad ban pynshisha la ka jaka die jingbam ka long kaba la ïoh jingbit katkum ka aiñ ne em.
Ka tnad ka la pynshai ruh ba ym shah ban thoh da ka kti ïa u number licence ha ki bill kiba la shon lypa. Baroh ki nongkhmih ïa ka kam die jingbam ki dei ban buh lypa ïa u number ha ka billing software, khnang ba un paw shai ha ki bill.
Ki FBO ki dei ban pyndep ïa kane ka jingbthah hapoh 30 sngi naduh ka sngi ba ki la ïoh pdiang ïa ka hukum. U Dr Beda u la maham ba ki briew ne ki jaka khaïi kiba ym bud ïa kane ka hukum kin sa shah leh katkum ka aiñ hapoh ka Food Safety and Standards Act, 2006.
