SHILLONG : Ki pulit jong ka East Khasi Hills kin pynthikna ba ka jingshngaiñ kan don ha baroh ki jaka khnang ba ka jingrakhe ïa ka Durga Puja ha Shillong kan long kaba shongsuk bad khlem kano kano ka jingkulmar, la ong u Superintendent of Police (SP), u Vivek Syiem, ha ka Sngi Nyngkong.
U Syiem u la ong, “Ngi la pan ban ioh shuh shuh kham bun ki pulit, bad yn pynthikna ba ki pulit bad ki lad jingïada kiba biang kin don ha man la ki jaka.”
U la ong ba ki dang bishar bniah ïa ka jingdonkam jong ki pulit bad haduh katno ngut ki pulit yn donkam.
U la bynrap, “Haduh mynta, ym pat shim ïa ka rai kaba khatduh halor ka jingdonkam jong ki pulit. Ngi dang pynbeit ïa kane, bad ngi dang don por. La pan shuh shuh ïa ki pulit, bad ngin dang bishar biang ïa ka jinglong jingman na ka por sha ka por.”
U SP u la ong ba yn lum ïa ki pulit na kylleng ka jylla, nalor ki pulit CRPF kiba la don lypa.
Haba kylli halor kane, u la ong, “Em, mynta tang ki pulit jong ka jylla. Ngi la don lypa ïa ki pulit CRPF, hynrei ngi dang lum shuh shuh ïa ki pulit na kylleng ka jylla.”
Haba kren halor ki jingpynkhreh, u Syiem u la ong ba ki ophisar kiba peit ïa ki sector bapher bapher ki la dep pynlong ïa ki jingïalang bad baroh ki nongshim bynta ban pynthikna ba ka jingrakhe kan ïaid beit ïaid ryntih.
U la ong ruh ba la dep ai jingbthah ban buh ïa ki CCTV camera bad ban shim ïa ki lad jingïada na ka jingkem ding.
La pynleit jingmut kyrpang ruh ban lait na ki jingjia ba ki khynnah kin jah bad ban tehlakam ïa ki jingjia aksiden.
U la bynrap ba la bthah ruh ïa ki committee jong ka Puja ban pynbeit ïa ki nongtrei mon sngewbha. Ki nongtrei mon sngewbha kin ïoh jingïarap na ki pulit Shillong Traffic Police ha ki pandal kiba heh bad ha ki jaka kiba kongsan.
