SHILLONG : Tang hadien katto katne sngi ba la lap ïa ki taiar ba la thang ha ki bynta bapher bapher jong ka nongbah Shillong ryngkat ki khubor kiba maham pyrshah ïa ka jingkem naphang, ki runar dang ngir hynne ka step ki la kawang da ki petrol bom ha ki bynta jong ka Laban Police Station.
Ka jingjia ka la jia ha ka por kumba 2:30 mynstep jong ka Sngi Saitjaiñ.
Ha kane ka jingjia, la iathuh ba la kawang ar tylli ki petrol bomb na shilliang ka kynroh sha ki bynta ba shapoh jong ka compound jong ka Police Station. Ki petrol bom ki la hap bad dei ïa kawei ka Police Gypsy kaba la pynieng hapoh compound, kaba don ïa ka registration number ML-02-0196, bad kaba la kem ding.
Arngut ki pulit kiba don hapoh ka Police Station ki la lait na ka jingjia khlem da mynsaw.
Katkum ka jingong jong ki Pulit, la iathuh ba na ki dur na ka CCTV ki pyni ba ki petrol bom ba ki runar ki kawang ki wan na shabar jong ka kynroh bad ki la hap hapoh ka compound jong ka Police Station.
U SP East Khasi Hills, Bah Vivek Syiem, u la ong ba ka jingtohkit ka dang ïaid shakhmat ban lap ïa ki briew kiba donkti ha kane ka jingjia.
Hadien kine ki jingjia, la pynkhlaiñ ruh ïa ka jingpahara bad ka jingïada jong ka Police ha kylleng ka nongbah Shillong.
