Shillong: Ka Shillong Sports Association’s Super Cup 2026 kan sdang lashai ka sngi Hatmajai jong ka taiew daka jingiakhun ia ka playoffs kaba nyngkong hapdeng ka Nongkseh SSCC pyrshah ia ka Sawmer SC ban sdang ha ka por 2:45 nohphai sngi.
Ka jingpynlong ia kane kawei pat ka lympung ialehkai, ka long hadien ka jinglah ban pynkut noh shwa ia ka shi wat ialehkai jong ka lympung Shillong Premier League 2026, ha ka sngi Saitjain ka taiew kaba la dep, ha kaba ki khmat pat mynta yn ia phai sha kane ka jingiakhun ka Super Cup, kaba la sdang ban pynialehkai naduh u mynshem snem,
Ha kane ka lympung tang kynhun/klob ba kynjoh sha ka kyrdan jong ka Top 6 ka SPL, ki ioh ba kin iakhun ha kane ka lympung, ha kaba ka Mawlai SC bad ka Shillong Lajong FC, ki long ki artylli ki kynhun ba la jam lypa sha ka semifinal, hadien ka jinglah ban rah ia ka nam kum ka lahduh bad ba wan ba-ar ha kane ka samoi ialehkai kaba mynta, ia kaba la bynrap lang sa ka kynhun ialehkai ka Nongkseh SSCC ka Sawmer SC kiban iakhun ia ka playoffs ba nyngkong lashai ka sngi, bud pat sa ka kynhun ialehkai ka Langsning FC bad ka MLP FT.
Ha ka samoi ialehkai ba la dep, ka nam lahduh na kane ka lympung dei ka Shillong Lajong FC hadien ba ka la lah ba kan pynliem ia ka Rangdajied United FC, kaba mynta ka samoi kam shim la lah ban ioh rung sha kane ka kyrdan iakhun.
Ka jingiakhun kaba kum kane, ka juh wanllam pat ia ka khubor lam pongpet bad kum ka nuksa ha ka samoi ialehkai u snem ba la dep, ka Rangdajied kaba la lah ba kan ioh bat ia ka kyrdan kaba san ha ka SPL 2025 ka la iai bteng ba kan jam shakhmat tad haduh ba kan da rung sha ka phainal.
Namar ha ki lympung iakhun ba kum kane ne ka knockout, ka donkam ia katta ka dur ka dar bad ka rukom pyrkhat ialehkai kaba da kumwei na ki player, namar haba mih madan, kaei kaba donkam ka long beit ia ka jingjop ne ha man la ka jingiakhun dei ban mih beit ka resol mano ba rem ne mano ban jop.
Lada jia ba ka 90 minit ka kut ha ka jingiakhaid, hap ban rah ia ka sha ka extra time bad lada dang donkam hap ruh ban bteng pat ia ka shaduh ka tie breaker, kaba mut ba ki ktang lyer jong man la ki player ba iakhun ha madan, kin hap ban long kiba dap bad ba biang pura bha, kaba dei lyngba jong kane, kaba wanrah ia katta ka jingmuja, itynnad bad ba iakhaid bha naka bynta u paidbah nongwan peitkai.
