SHILLONG : U Symbud Myntri Rangbah ka jylla, u Bah Sniawbhalang Dhar, u la ong ba ka jingïakhih jong ka Cockroach Janata Party (CJP) kan ym ktah ïa ki samla jong ka Meghalaya. U la ong ba kane ka dei ka kam jong ka Sorkar Pdeng bad ka Sorkar Pdeng kan shim ïa ka sienjam ban pynbeit ïa kane.
Haba ki nongthoh khubor ki la kylli ha ka Sngi Nyngkong la ka jingïakhih jong ka CJP kan don ne em ïa kano kano ka jingktah ïa ki samla jong ka jylla, u Dhar u la ong, “Em, kan ym ktah satia namar kane ka dei ka kam jong ka Sorkar Pdeng. Nga tharai ba ka Sorkar kan pynbeit bha ïa kane ha ka kyrdan jong ka Sorkar Pdeng.”
Haba kylli halor ka jingdawa ban weng ïa u Chief Election Commissioner (CEC), u Dhar um shym la kwah ban ai jingkynthoh ei ei halor kane ka mat.
U la ong, “Peit, la ka long ka jingdawa ne kano kano kawei pat, nga tharai ba ka Sorkar India ka dei kaba dei ban jubab halor kane. Balei ngan jubab ha ka jaka jong ka?”
Haba kylli la ki samla kiba don ïa ka hok thep vote kin phai khmat neem sha ka CJP na ka liang u Dhar u la ong ba ka Sorkar ka ïeng skhem ban kyrshan ïa ki samla bad u don ka jingshaniah ha ka jingstad jong ki.
U la bynrap, “Ngam sheptieng na ka bynta ki samla. Nga ieid bad burom ïa ki samla ka Meghalaya ha baroh ki por, namar ki samla jong ngi ha Meghalaya ki long kiba stad bha bad ki tip ïa kaba ki dei ban leh ha ka lawei. Namar kum ka Sorkar, ngi don ryngkat bad ki.”
