SHILLONG : U Symbud Myntri Rangbah ka Jylla, Sniawbhalang Dhar, ha ka Sngi Balang u la ong ba ka rally jong ka VPP ha madan Polo kam lah ban khot kaba heh, namar wat hadien ka jinglum paidbah na 36 tylli ki constituency, kam shym la lah ban khring wat 10,000 ngut.
“Ka rally jong ka VPP ka dei na bynta 36 tylli ki constituency, hynrei wat 10,000 ngut ruh kim shym la poi. Kumno phi lah ban ong ba ka jingwan jong ki paidbah ka long kaba bun? Dei na kata ka daw ba kam dei ka jinglum paidbah kaba heh,” u la ong haba jubab ïa ki jingkylli halor ka rally jong ka VPP ban kyrshan ïa u kyrtong jong ka na ka bynta ka elekshon shiteng samoi sha Lok Sabha ha Shillong, u Dr Batskhem Myrboh.
U National Vice-President jong ka NPP u la ong ba lada ka party jong u ka khot ïa ki nongkyrshan na baroh 36 tylli ki constituency, ka jingbun jong ki paidbah kan long lai shah.
“Lada ka NPP ka khot na baroh 36 tylli ki constituency, ka jingbun kan long lai shah. Phi dei ban sngewthuh ba kane ka dei ka rally paidbah na bynta 36 tylli ki constituency, hynrei wat 7,000 haduh 8,000 ngut ruh kim shym la poi. Kumno phi lah ban ong ba ka jingwan jong ki paidbah ka long kaba heh? Kata ka long ka sakhi,” u la bynrap.
