SHILLONG : U Deputy Commissioner jong ka East Khasi Hills, u Abhilash Baranwal, ha ka sngi Balang u la ong ba ka bor synshar district kan pynthikna ba ki pandal Durga Puja kiba la tei ha ki surok PWD kin ym wanrah ïa ka jingpynwit ïa ki paidbah, watla u la pdiang ba ka jingkynriah ïa katto katne ki pandal ha kane ka por ka long kaba eh ban leh.
Haba jubab ïa ki jingpyrshah kiba la pynpaw da ki kynhun sengbhalang, u DC u la ong ba la bthah ïa ki sector magistrate ban ïatreilang bad baroh ki nongshim bynta.
“Don katto katne ki kynhun sengbhalang kiba la wan shakhmat ban pyrshah ïa ka jingtei ïa ki pandal Puja ha ki surok PWD, khamtam halor ka jingeh kaba ki paidbah ki mad. Ngi la shimkhia ïa kine ki jingpyrshah bad ngi la bthah ïa ki sector magistrate jong ngi ban pynbeit ïa kane,” u la ong.
“Man la u sector magistrate u peit ïa ki sector bapher bapher. Ngi la bthah ïa ki ban ïatreilang bad ka dorbar shnong, u OC jong ka thain bad kumjuh ruh bad baroh ki nongshim bynta ha ka thaiñ, ban pynthikna ba kan ym don kano kano ka jingeh ïa ki paidbah, katba ha kajuh ka por la burom ïa ki hok lehniam jong ki jaidbynriew Hindu,” u la bynrap.
Haba kren halor ki jingujor shaphang ki pandal kiba don ha ki surok PWD, khamtam ha R R Colony, u la ong, “U sector magistrate u la pynlong la kumno kumno 2-3 sien ki jingïalang bad ka dorbar shnong.”
U la ong ba ka jingkynriah ïa ki pandal ha kane ka por kan wanrah ïa ki jingeh ïa ki committee.
“Ha ka por ba la pynpaw ïa kine ki jingsngewkhia, ka la long ka por ha kaba ka jingkynriah ïa kine ki pandal lane ka jingwad ïa kawei pat ka jaka kan wanrah ïa ki jingeh kiba khraw bha ha ka liang ki jingdonkam kiba shisha ïa ki Durga Puja Committee,” la ong u Baranwal.
U la ong ba la shah ïa ka committee jong R R Colony ban bteng ïa ka jingtei ha kane ka snem katkum ka NOC ba la ai da ka PWD, hynrei la ai ïa ka jingmaham kaba shai.
“Hadien ka jingïakren bad ka dorbar shnong, la shah ban bteng ïa ka jingtei katkum ka NOC ba la ai da ka PWD, hynrei la pynshai bha ïa kine ki Durga Puja Committee ba kum kine ki jingpynbeit kim lah ban bteng ha ki snem ban wan namar ka jingpynwit kaba ki wanrah ïa ki paidbah,” u la ong.
Haba kren halor ka jingpynïaid ïa ka leit ka wan jong ki kali, u la ong, “Ngi la ïatreilang ruh bad ka ophis jong u SP ban pynthikna ba ki jingkylla lynti jong ki kali kin long kiba pynduna ïa ka jingdheng kali bad ïa ka jingdonkam ban kylla lynti, ym tang ha ka jingjngai hynrei wat ha ka por ba yn pyntreikam ïa ki ruh.”
“Ngi la bthah ïa ki pulit ban pynthikna ba kin don ki pulit pynïaid kali kiba biang ha ki surok, khnang ba ka jingdheng kali kan ym long kaba eh ban pynïaid,” u la ong, da kaba bynrap ba napdeng ki 69 tylli ki pandal, ka pandal ha R R Colony ka la ju shim ïa ka bynta jong ka surok PWD.
Haba kren halor ka jingpynngam ïa ki blei ha um, u Baranwal u la ong ba la pynbeit ïa ki por bapher bapher namar ka jingtei kaba dang ïaid shakhmat ha ki rud wah.
“Ka jingtrei ïa ki jingtei ha ki rud wah ka dang ïaid shakhmat. Namar kata, ha ka jaka jong san tylli ki jingpynrung ïa ki dur blei ha ka um kiba ju long lang ha ka por ba mynshwa, mynta ka jingpynrung ïa ki dur blei ha ka um ha katei ka jaka ha kajuh ka por ka la nang duna,” u la ong.
“Ka jingbun ki pandal Puja ka la neh kumjuh ha kine ki snem, kumta ngi la buh ïa ki por bapher bapher ha kaba ki pandal Puja na ki sector bapher bapher kin lah ban sdang ïa ka jingïaid jong ki sha ka jaka pynngam ïa blei ha um. Ngin sa buh jingthoh ïa man la ka pandal bad kheiñ ïa ka por kaba lah ban shim ban poi na man la ka pandal sha katei ka jaka, khnang ban pynbeit ïa ka rukom ïaid ha kaba yn pynduna ïa ka jingdheng kali,” u la bynrap.
