SHILLONG NAITUNG 27: Ka dei lehse ka khubor kaba lah ban ktik ïa ka jingmut jong kiba bun kiba thmu ban thied kali thymmai, khamtam kiba kwah ban pyndonkam noh da ka kali ilektrik.
Ka Sorkar Meghalaya mynta ka la plie kawei ka lad kaba lah ban khring ïa kiba kwah ban pyndonkam noh da ka kali ilektrik namar ka la tyrwa ba kino kino kiba thied kali ilektrik thymmai kiba kynthup ïa ka kali saw shaka, lai shaka bad ar shaka, kin ïoh ei ka pisa T.25 hajar tyngka bad yn pyllait ei ruh ïa ka bai pynrung kyrteng (registration fee).
Ïa kane ka rai ai jingmynjur da ka Kynhun Myntri jong ka Sorkar Jylla ha ka jingïalang kaba la pynïaid da u Myntri Rangbah u Conrad K Sangma.
Ka jingthmu jong ka Sorkar ban pynshlur ban pyndonkam da ki kali ilektrik ka long ban pynduna ïa ka jingjaboh jong ka lyer, bad ba ka leit ka wan ki paidbah da ki kali ilektrik kan kham suk bad ba ki nongshong shnong ruh kin kham kotbor.
