Shillong, Nailar 04 : Ka Office jong u Commissioner for Persons with Disabilities hapoh ka Social Welfare Department jong ka sorkar jylla ha ka jingïatreilang bad ka Secretariat Administration Department (SAD) bad Trestle Labs Pvt. Ltd., Bengaluru, ha ka sngi Ba-ar ka la pynlong ïa ka prokram pynsngewthuh halor ka “Assistive Technology and Digital Accessibility for Government Employees”, hapoh ka phang “Promoting an Inclusive Workplace for Employees with Visual Impairment.”
Haba kren ha ka jingïalang, u Adviser jong ka Sorkar Meghalaya ba dei peit ïa ka tnad Social Welfare, Bah Paul Lyngdoh, u la pynpaw ïa ka jingdonkam ban thaw ïa ka jaka trei kaba kynthup lang ïa baroh bad ban pyndonkam ïa ka Information and Communication Technology (ICT) ban pynsuk ïa ki jingshakri Sorkar bad ki jaka trei na ka bynta ki briew kiba don jingthut ha ka met.
Haba ai jingïaroh ïa ki nongpyniaid, u Bah Paul Lyngdoh u la ong ba kane ka sienjam kan ïarap ïa ka Sorkar Jylla ban thaw ïa ka rukom treikam kaba kynthup lang ïa baroh lyngba ka jingpyndonkam ïa ka assistive technology bad digital accessibility. U la ai jingïaroh ruh ïa ka jingtrei jong ka Office Commissioner for Persons with Disabilities, ka Secretariat Administration Department bad Trestle Labs ban pynlong ïa kane ka prokram.
Da kaba pynpaw ïa ka jingdonkam ban pynkylla ïa ka rukom pyrkhat shaphang ki briew kiba don jingthut ha ka jingïohi, u Bah Paul Lyngdoh u la ong ba ka jingïohi da ki khmat tang marwei kam pynkut ïa ka jinglah ne ka sap jong u briew.
U la ong ba don bun ngut ki briew kiba don ka jingïohi kaba biang hynrei kim don ka “jingiohi jngai”, katba kiwei pat kiba don ka jingïohi kaba duna ne ym ïohi satia ki don ka “jingiohi jngai” kaba kyrpang. U la kyntu ïa ki nongtrei Sorkar ban don ïa ka rukom trei kaba kynthup lang ïa baroh bad kaba don ka jingia burom ha ki jaka trei.
U Bah Paul u la kyntu ruh ïa ki nongtrei kiba don jingthut ha ka met ban ym ñiew ïa ka jingduna jong ki kum ka jingkhanglad, hynrei ban ithuh ïa ki sap bad ka jinglah jong ki ban noh synñiang kaba donkam sha ka imlang sahlang.
Haba kren ha kane ka sngi, u Secretary jong ka Secretariat Administration Department (SAD), Swapnil Tembe, IAS, u la pynpaw ïa ki sienjam kiba la shim da ka tnat ban pynsuk ïa ka Secretariat na ka bynta ki briew kiba don jingthut ha ka met. U la kren shaphang ki sienjam kum ka jingtei ïa ki ramp, ka jingpynbha ïa ki jaka leit bar bad kiwei kiwei ki jingpynbeit kiba thmu ban pynsuk shuh shuh ïa ki briew kiba don jingthut ha ka met.
U Tembe u la ong ruh ba lada don kino kino ki jingai jingmut ban pynbha shuh shuh ïa ka, ki lah ban pynsngew sha u, khnang ba ka tnat kan lah ban shim ïa ki sienjam kiba donkam ban pynbha ïa ki jaka bad ban pynsuk ïa ka Secretariat bad kiwei kiwei ki ophis Sorkar na ka bynta ki briew kiba don jingthut ha ka met.
Ha kane ka sngi, u Bah Paul Lyngdoh u la aiti ïa ka Kibo assistive technology device sha ka Secretariat Administration Department ban pyndonkam ha ki kam ophis.
Ha kane ka prokram la ïashim bynta ruh da u Commissioner for Persons with Disabilities, Lyngkor Kynjing, MCS; Director ka Social Welfare, Saloni Verma, IAS; ki ophisar na ki tnat Sorkar bapher bapher; ki nongshah khot sngewbha; bad kiwei kiwei ki nongïashim bynta.
