Shillong -U Myntri ka tnat Pule Puthi ka sorkar jylla, Bah Lahkmen Rymbui, u la khyrwit tyngeh ia ka ïa ka jingdawa jong ka Voice of the People Party (VPP) ban weng noh ïa u Commissioner & Secretary ka tnat, u Vijay Kumar Mantri.
U Bah Rymbui u ong ba u Mantri u dei uwei na ki ophisar kiba trei shitom bha bad uba suk ban ïakynduh. U la ong ruh ba watla u Mantri um lah ban pynbeit mardor ïa baroh ki jingeh, hynrei u sngap bad sngewthuh ïa ki jingeh jong kiba wan ban pynsngew.
U Myntri u la kyntait ruh ïa ka jingkynnoh ba u Mantri um sngap ïa ki nonghikai. U la ong ba ha ka por ba ki nonghikai ki pynlong jingiakhih ha Malki, dalade u la leit ar sien ban ïakren bad ki kum u nongmihkhmat ka sorkar.
U ong ba ka jingdawa jong ki nonghikai ka long halor ka jingsiew kaba kham bha bad ka jingïada ïa ki. Hadien ka jingïakren bad ki kynhun nonghikai, ka sorkar ka la wanrah ïa ka rukom jingsiew kaba thymmai.
U Rymbui u ong ba kane ka rukom thymmai ka ai ka jingshngaiñ bad ka jingithuh ïa ka jingshakri jong ki nonghikai. “Mynshwa, ki nonghikai kiba trei la bun snem bad kiba dang shu sdang ki lah ban don ha kajuh ka kyrdan, hynrei mynta ka system ka ai jingïapher katkum ka jingshakri”.
U la kdew ruh ïa ka jingpynkup burom jong ki nonghikai ïa u Chief Minister Conrad K Sangma ha Shillong, Tura bad Williamnagar, kum ka dak ba ki jingeh jong ki nonghikai ki dang ïoh jingïatreilang na ka sorkar.
U Rymbui u la ong ba lada ka VPP ka tip ïa u ophisar uba kham trei bha ban u Vijay Mantri, ka dei ban wanrah kyrteng ïa u.
U la kyntu ruh ban ym pynduh mynsiem ïa ki ophisar kiba trei shitom ban shakri ïa ka sorkar bad ka paidbah.
U Rymbui u la pynkut da kaba ong ba ym don mano mano uba janai, hynrei baroh ki dei ban pyrshang ban pyndep bha ïa ka kamram jong ki.
