Shillong: Hadien ka jinghap ban mad ia ki soh ba kthang na ki jingiakhun ba la dep, ka kynhun ialehkai ka Nongkseh SSCC ka la khieh khlieh biang sa shisien tad haduh ba kan da lah ba kan pynliem syndon da 7-1 ia ka MLP FT ha ka lympung ialehkai jong ka Shillong Premier League 2026, ba la pynlong ia ka da ka Shillong Sports Association, ha SSA Stadium, Polo, hynne ka sngi.
Ban shu bynrap hangne, ba na kane ka jingiakhun ba mynta ka sngi, ka Nongkseh SSCC kaei aba ka donkam ka long beit ia ka jingjop kum shi bynta ba kan buh ialade hapdeng ka thong jong ka jingiakhun ban iaknieh rah ia ka nam kum ka lahduh.
Kumta haba la hiar bha ka rukom ialehkai hadien ba la dep ban iakhun ha ka lympung ka Durand Cup 2026, hynne ka sngi, napdeng kine ki 7 tylli ki kol, saw tylli na kine kidei kiba la lah ban lam khmat da u kapten u jong ka u Hardy Cliff Nongbri (6 min, 12min, 55min bad 87min).
Katba ia ki kol kiba sah la ioh ban thep ia ki da u Kitboklang Pale (42min), Shano Tariang (61 min) bad u Aenam Graffenberg Jyrwa (65 min).
Katba ia ka shi kol ban lait brut ka MLP FT la thep ia ka da u Bisharlang Kharumnuid (78 min).
Kumta da kane ka resol ba mynta ka sngi, ka pynlong ia ka Nongskeh SSCC ba kan kiew ruh syndon kham shalor jong ka miej iakhein point, hadien ba ka la ioh ba kan khur 7 point bad ka goal difference ka jong ka kaba long +5 bad don ha ka kyrdan kaba saw, katba ka Nangkiew Irat (-1) kan iai neh ha ka kyrdan kaba san katba ka MLP FT (-5) da kane ka nam rem ba mynta ka sngi ka hiar pat sha ka kyrdan ba 6.
Lashai ka sngi ka jingiakhun jong kane ka lympung kan long hapdeng ka Shillong Lajong FC pyrshah ia ka Sawmer SC, kaban long ha ka por 3:00 baje nohphai sngi.
