Shillong : Ka United Democratic Party (UDP) ha ka sngi Thohdieng ka la ong ba ka party ka dang don ha ka jingiatylli, watla 6 ngut ki MLA jong ka kim shym la wan sha ka jingïalang jong ka Central Executive Committee (CEC) kaba dei ruh ka sngi ba ki rakhe ia ka sngi ba la seng ia ka party.
Kine ki MLA kiba ym shym la wan ki long u Bah Paul Lyngdoh na West Shillong, u Bah Synshar Roy Kupar Lyngdoh na Sohiong, u Bah Matthew Beyondstar Kurbah na Mawphlang, u Bah Pius Marwein na Ranikor, u Bah Kyrmen Shylla na Khliehriat bad u Bah Mayralborn Syiem na Nongpoh.
U General Secretary ka UDP, Titosstarwell Chyne, u la ong ba ka jingïalang jong ka CEC ka la long kaba seisoh bad ki nongïalam na kylleng ka jylla, kynthup na Garo Hills bad Jaintia Hills, ki la wan ïashim bynta.
U la ong ruh ba 5 ngut ki MLA ki la don ha ka jingïalang.
Haba kylli halor ka jingkynnoh ba ki MLA UDP ki lah ban iehnoh ïa ka seng bad leit sha ka BJP, u Bah Chyne u la ong ba ym don kano kano ka dak kum kata haduh mynta.
U la ong, “Ka seng ka dang ïatylli bad ki MLA jong ngi ruh ki dang ïatylli. Ym don jingkylli ban mih noh na ka seng.”
Hynrei, u la pynshai ba ym lah ban tip lypa ïa kaei kaba lah ban jia lashai. U la ong ba katkum ka jingpynshai jong ki MLA ha khmat ka CEC, ym don kano kano ka jingthmu ban mih noh na ka seng haduh mynta.
Halor ka jingbym wan jong ki 6 ngut ki MLA, u Bah u la ong ba u Bah Synshar Kupar u don ka jingïap briew ha ïing, katba u Pius Marwein u don shabar jylla. Kiwei pat, u la ong, ki la dep don ki prokram kiba la pynbeit lypa.
Shuh shuh haba pynshai halor ka jingbym wan jong ki ha ka jingrakhe ïa ka sngi seng ka party, u Bah Chyne u la ong ba baroh ki la shah khot, hynrei lehse kim lait namar ki don ki kam bad ki prokram jong ki. U la ong ruh ba ka seng kam lah ban pynbor ïa ki ban wan.
Halor ki khubor ba don ki MLA UDP kiba shong ha Delhi, u Chyne u la ong ba ki MLA ki laitluid ban leit sha Delhi ne sha Kolkata bad ban ïakynduh ïa ki nongïalam sorkar pdeng.
U la ong ba ka jingïakynduh ïa ki Myntri ka sorkar pdeng, u Prime Minister ne u Amit Shah kam mut ba u MLA un leit ban pynïasoh bad ka BJP.
Halor ki khubor ba don ka jingpyrshah ïa u President ka UDP, Bah Metbah Lyngdoh, uBah Chyne u la ong ba kane ka mat la ïakren ha ka jingïalang bad la pynshai ba ym don jingeh bad ka jingling nongïalam jong ka seng haduh mynta.
U la ong ruh ba u la ïohi ïa ki MLA kiba don ha ka jingïalang ki sngewkmen, ki rkhie bad ki ïakren bha bad kiwei pat.
Haba la kylli lada ka UDP ka don jingthmu ban pynkylla ïa u President jong ka seng, u Chyne u la ong ba ym don kano kano ka jingthmu kum kata.
U la pynshai ba ha ka UDP, dei ka General Council kaba don ïa ka bor ban rai lada u President uba mynta un dang bteng ne yn pynkylla ïa u.
