JAM KI SHIPARA SHA KA QUATERFINAL & RAH KA ASSAM IA KA NAM TEAM CHAMPION
Shillong: U Raynell bad Gavin Kharbuki kiba dei artad ruh shipara ka kur Kharbuki ki la lah ba kin jam sha ka kyrdan iakhun jong ka quarterfinal, katba ka kynhun ialehkai ka Assam ki la sar lut baroh naka bynta ban ioh ba kin rah ia ka nam team champion ha ka sngi kaba ar ka lympung ialehkai North East Zone Inter-State Badminton Championship 2026, kaba la long ha JN Indoor Stadium, mynta ka sngi.
Ha ka jingiakhun ia ka phainal jong ka team event, ki khynnah shynrang ka Assam ki la lah ba kin pynliem ia ka Arunachal Pradesh bad ha ka kyrdan iakhun ka men’s team final pat, ka Assam ka la lah ba kan pynliem noh ia ka Manipur, katba na ka liang ka jingiakhun ki khynnah kynthei bad women’s ka kynhun ialehkai ka Assam ka la lah ba kan pynliem ia ka Mizoram.
Haba phai sha ka sngi kaba ar jong kane ka lympung, ka kynhun ialehkai ka Meghalaya, ki la lah ban ioh kheit ia la ki soh ba thiang ka jong ki, ha kaba ka Netania T Tariang ka la lah ba kan pynliem ia ka Choying Tsepel Tamang ka Sikkim da 15-2, 15-3 ha ka kyrdan iakhun jong ka girl’s U-19, katba ka Sneha Chetri kia la shah liem noh ha ka thei ialehkai ka Mizoram ka Lalnunhluni da 15-12, 15-13.
Katba na ka liang ka jong u Raynell u la lah ba un pynliem noh ia u Porvash Prasad ka Sikkim da 15-4, 15-10, bad u Gavin pat u la lah ba un pynliem noh ia u Lalpekhluzuala ka Mizoram da 15-6, 10-15, 15-7.
Haba phai sha ki jingiakhun ia ka final jong ka team event, ki khynnah ka Assam ha ba sdang jong ka sngi ki la lah ban pynliem da 2-0 ia ka Arunachal Pradesh bad ki khynnah kynthei pat ki la lah ban pynliem ia ka Mizoram da 2-1.
Katba ha ka jingiakhun ka kyrdan jong ka men’s bad women’s team event, ki rang ialehkai ka Assam ki la lah ban pynliem ia ka Manipur da 3-1, bad na ka liang ki kynthei ki la jop da 3-0 ia ka Mizoram, kaba ha kane ka kynti ia ka jingjop ka Assam la lam khmat ia ka da ka thei ialehkai bna nam kane ka jylla ka Ashmita Chaliha, kaba la khur ia ka takma ksiar ha ka 2024 Asia Team Championship.
