Shillong: Ka Rangdajied United FC ka la lah ba kan khur ia ka nam jop kaba marbud ka jong ka, ne kaba ar bad kane ka la wan ba hynne pat ka sngi ka la lah ba kan pynliem ia ka Nangkiew Irat da 2-1, ha ka lympung ialehkai jong ka Shillong Premier League 2026.
Kane ka namjop ka Rangdajied ka jia long ba ha kane ka samoi ialehkai ba mynta ka la sdang kham suki , Hynrei katba nang jam shakhmat ka jingiakhun ka la sdang ban wandur wan dar ka rukom ialehkai ka jong ka, katno tam lei lei ba ha ki lai sien iakhun ba ka la dep kam shim la lah ban ioh khur ia kino kino ki jingjop, hynrei da kane ka jingjop kaba hynne pat ka sngi, kan pynlong ia ka ba na ka kyrdan kaba phra joit kan kiew sha ka kyrdan kaba hynriew, katba na ka liang ka Nangkiew kan hiar sha ka kyrdan ba hynniew bad ka MLP ka hiar sha ka kyrdan kaba phra.
Ia ki artylli ki kol ka Rangdajied la thep ia ki da u Mebannangkiew Thabah (18’) bad Micky Marwein (81’) katba ia ka shi kol ka Nangkiew Irat la thep ia ka da u Ronaldkydon L Nonglait (32’) .
Ka jingiakhun khyndiat ka long kaba kham shongshit katno tam lei lei haba ki khynnah ialehkai ka Rangdajied ba man la u nongialehkai u da kyntiew bha ia la ka rukom ialehkai ka jong u, katta naduh ka rukom ban ia pashat bol, ban tehlakam ia ka jingiakhun.
Ha kane ka jingiakhun, ka Nangkiew ka la sei bujli da uwei pat u rang ap kol u jong ka u Akash Thapa kaba dei ruh ka sien ialehkai ba nyngkong ia u ha kane ka samoi, ha kaba ki la don pat ruh ki khep ba u la lah ba un ieng iada bha ia la ka jong ka kol ban nym ailad ia ka Rangdajied ban ioh ban pynkhih ia ka jar.
Pynban ka la don pat ka khyllipmat ba ka Nangkiew ruh ka la sdang ban ban ialehkai bha bad nion bor bah ia ka Rangdajied, kaba hangne mih paw ki kato katne ki kabu ksiar ia ka ban ioh ban pynkhih ia ka jar, tangba kane ka sur ialehkai kam shim la lah ba kan neh slem, kaba pynlong ia ka Rangdajied ba kan lah ban khur pat ia ka jingjop.
Lashai pat ka sngi, ka Laitkor kaba don ha ka kyrdan ba khyndai kan mih madan ban iakhun pyrshah ia ka Sawmer kaba don ha ka kyrdan kaba saw kaban long ha ka por 3 baje nohphai sngi.
