Shillong : U Myntri ka tnat Labour ka Sorkar Meghalaya, u Bah Methodius Dkhar, u la ong ba ka Sorkar ka la pynkhlaiñ ïa ki kyndon ban register ïa ki nongbylla ba wan na shabar jylla kiba wan trei sha kane ka jylla.
Haba kren bad ki lad pathai khubor, u Myntri u la aithuh ba dang ha ka 9 tarik mynta u bnai, ka Sorkar ka la plie ïa ka website bad ka MIRSS na bynta ka jingregister ïa ki nongtrei bar jylla. La pynlong ruh ïa ki jingpynkylla ha ki kyndon, bad mynta ka aiñ ka la treikam.
“Kane kan pynsuk bad pynkhlaiñ ïa ki kyndon ban peit ïa ki nongtrei migrant bad ïa ki contractor, khnang ba kin bud ïa ki kyndon bad ki aiñ kiba ïadei bad k inongbylla bar jylla ,” la byrnap shuh shuh u Bah Methodius.
Haba kren halor ka kuna, u Myntri u la ong ba ka don lai kyrdan jong ka jingpynshitom. Ha ka sien banyngkong, u contractor u hap ban siew kuna ₹10,000, ha ka sien kaba ar ₹25,000, bad ha ka sien kaba lai haduh ₹1 lak, ryngkat bad ka jingshah set along haduh lai bnai.
U la pynshai ba kane ka kuna kan dei ïa u contractor bad kam dei satia ia u nongbylla.
“Ka kuna bad ka jingsiew kaba ngi buh kan long ïa u contractor, ym ïa u nongbylla,” u la ong.
U Bah Methodius u la ong ruh ba ka tnat Labour kan peit bad buddien ïa ki nongbylla ha ki jaka ba ki trei, ym ban leit wad ïa ki ha ki surok.
“Lada ngi lap ïa kino-kino kiba trei ha kano-kano ka jaka khlem da register, ngin pynshitom ïa ki. Hynrei ka jingpynshitom kan long ïa u contractor, ym ïa u nongtrei,” u la ong.
