SHILLONG : U Myntri Rangbah ka Jylla, u Conrad K Sangma, ha ka Sngi Ba-ar u la ong ba ki pilot project ban khang ïa ki par dewiong ba la shu ieh kumto ha ka Jylla ki dang don hapdeng ka jingpynkhreh bad la khmih lynti ba yn sa ïoh ïa ki jingbit ha ki por ban sa wan.
“To ngan pynthikna ïa baroh ba ka jingkhang ïa ki par dewiong, watla ka jingker sainar ka lah ban ym long, hynrei ki pilot project ban khang ïa ki par dewiong ki dang ïaid shakhmat. Ngi khmih lynti ba shen ngin sa ïoh ïa ki jingbit bad ngin lah ban ïaid shakhmat ha kane ka kam,” la ong u Sangma.
U la jubab ïa ki jingkylli halor ka kaiphod shipor kaba dang shen la aiti da u Justice B P Katakey halor ka jingtih dewiong.
Hynrei, u Myntri Rangbah u la ong ba um pat shong bishar bniah ïa ka kaiphod kaba thikna.
“Ngam pat tip ïa ka kaiphod kaba bniah, bad kan ym long kaba dei ïa nga ban jubab halor kane mynta. Lehse ngan sa jubab ha ka por ban wan, ynda nga la ïoh ïa ka kaiphod kaba bniah,” u la ong.
Haba kylli halor ka jingpyndonkam ïa ki jingkyrshan pisa, u Sangma u la ong ba ka rukom treikam ban pyndonkam ïa ki pisa lyngba ka Meghalaya Environment Protection and Restoration Fund (MEPRF) ka dang ïaid, hynrei ki kyndon kiba la buh da ka Sorkar Pdeng bad ka ïingbishar ki la pynlong ïa kane ka kam kaba kham jwat.
“Ka rukom pyndonkam ïa ki pisa lyngba ka MEPRF ka dang ïaid, hynrei ka Sorkar India bad ka ïingbishar ki la buh ïa ki katto katne ki kyndon kiba ngi hap ban bud ban pyndonkam ïa kitei ki pisa. Kane ka la pynlong ïa ka kam kaba kham jwat ïa ngi,” u la ong.
Haba kylli shaphang ka 13 lak metric tonne u dewiong kaba la kdew ha ka kaiphod, u la ong, “Ban jubab kyrpang ïa ka jingkylli jong phi halor ka 13 lak metric tonne u dewiong, nga donkam ban ïoh shuh shuh ïa ki jingtip bad ki jinglum jingkhein.”
