SHILLONG : U Nongïalam ka Liang Pyrshah, Dr. Mukul Sangma, ha ka sngi Palei, u la ong ba ka jingkynnoh shim pisa beaiñ da ki pulit ha ki check gate beaiñ kam lah ban jia khlem ka jingïada ne jingkyrshan na ki bor kiba halor, bad u la dawa ban shimkam katkum ka Meghalaya Police Act, 2010.
“Ka Police Act 2010 ka ai bor ban shimkam pyrshah ïa kino kino ki pulit kiba pyndonkam bakla ïa ka kyrdan jong ki. Lada ki pulit ki lah ban leh ïa kum kine ki kam khlem da shah pynshitom, kam lah ban jia khlem ka jingkyrshan na ki bor kiba halor,” la ong u Sangma.
U la ong ba kine ki jingkynnoh ki donkam ïa ka jingtohkit kaba bniah, kaba pyrkhing bad kaba laitluid.
“Kine ki jingkynnoh ki donkam ïa ka jingpynshitom kaba kham pyrkhing bad ka jingtohkit kaba laitluid na ka jingshah ktah ha ka saiñ pyrthei. Hato kane ka lah ban jia lada ka Sorkar ka dang kyntait ïa ki jingjia, kumba ju long?” u la kylli.
U Sangma u la ai jingïaroh ïa ka Khasi Students’ Union (KSU) halor ka jingleit khynra jong ka kaba dang shen, bad u la ong ba ki seng kiba peitngor ki pynlong ïa ka Meghalaya ban long kaba husiar.
U la dawa ruh ban khot ïa ka jingïalang jong ka State Security Commission ban ïakren halor ka jingïadei hapdeng kiba donkti ha kine ki kam.
“Ha ka jingïakren shimet, nga la kyntu ïa u Myntri Rangbah ban khot ïa ka jingïalang jong ka State Security Commission. Ka Sorkar ka dei ban pynlong ïa kane ka jingïalang shisien man la ki lai bnai. Katno sien ngi la ïoh ïa kum kane ka jingïalang? Kam dei ka kamram jong nga ban iai pynkynmaw ïa ki,” u la ong.
U Sangma u la ong ba ha u snem 2010, ka Sorkar jong u ka la pynmih ïa ka hukum sorkar kaba khang ïa ki check gate beaiñ kiba pynsangeh ïa ki trok kit dewiong, bad ka la buh ïa ka jingkitkhlieh ha ki Deputy Commissioner (DC) bad ki Superintendent of Police (SP).
“Kata ka hukum ka dang treikam haduh mynta. Kumba u Symbud Myntri Rangbah, u Prestone, u la ong, kata ka hukum ka dang treikam. Hynrei ka hukum kam don jingmut lada ym pyntreikam ïa ka,” u la ong.
U la ong ruh ba ka jingpynkynriah kam bad thungkam ïa ki pulit katba mon ka long pyrshah ïa ka Police Act bad ka ktah ïa ka jinglong hok jong ki.
“Ki pulit ki don bynta kaba kongsan ha ka jingpyntreikam ïa ka hok bad ka aiñ. Lada ka jinglong hok jong ki ka shah ktah, kan don ka jingktah kaba khraw. Ym lah ban shu pynkynriah kam ne thungkam ïa ki katba mon,” u la ong.
Haba ïadei bad ka jingdawa ban pynsangeh kam shipor ïa ki SP bad DC, u Sangma u la ong, “Dei ban pyntreikam ïa ki Section 107 bad 108 jong ka Police Act, bad ban shim jingthoh ïa ki jingkren jong kiba don jingïadei bad kane ka kam, khnang ba ka jingtohkit kan long kaba laitluid bad hok, bad ban tip mano kiba donkti shadien jong kane.”
