Shillong, Nailur 12 : “Balei ym long ia ka BJP?” Kane ka dei ka jubab jong u nongïalam barim jong ka United Democratic Party (UDP), Dr. Jemino Mawthoh, ïa ki nongkynthoh, hadien ba u la rung syndon jluk sha ka Bharatiya Janata Party (BJP) ha ka Sngi Saitjaiñ, ha ka jingïadonlang jong u President ka BJP Meghalaya, Rikman G Momin, bad u MLA ka party, Bah AL Hek.
Hadien 15 bnai jong ka jingsngap jar naduh ba u la mih noh na ka UDP, u Dr. Jemino u la pynkut ïa ka jingsngap jar jong u bad mynta u la jied ban rung sha kawei na ki seng saiñpyrthei kiba heh tam ha ka pyrthei.
U Dr. Jemino u la ong ba ka BJP ka dei ka seng kaba nyngkong tam kaba la kyndit ban ïakren bad u hadien ba u la iehnoh ïa ka UDP ha u bnai Jymmang jong u snem ba la dep.
“Ha ka por ba ka khubor shaphang ka jingiehnoh jong nga ka la paw ha ki lad pathai khubor, u Bah Kharkrang u dei u briew uba nyngkong ban kren. U la ong ba nga long ka atiar jong ka party, hynrei ngan ong ïa phi ba u Bah Kharkrang hi u long ka atiar jong ka party,” u la ong.
“U khlem da pynïaid ia jingïakren lyngba ki lad lynti kiba bun. Ka rukom ba u ïada bad u ïeng skhem na ka bynta ka seng, baroh ngi sngewtynnad ïa kata,” u la bynrap.
U Dr. Jemino, uba long u MLA barim ka Nongthymmai bad uba la shakri kum u Working President ka UDP la kumba ar snem bad kum u General Secretary la kumba khyndai snem, u la ong ba u la pyrshang ban pynïatylli ïa ki seng saiñpyrthei riewlum sha kawei ka seng kaba khlaiñ, hynrei kata ka jingpyrshang kam shym la seisoh.
“Nga la pyrshang ban ïakren bad ki seng riewlum. Hynrei ngim lah ban pynurlong ïa kata. Hadien ba ngi la rem ha ka elekshon 2023, nga la sngew ba la biang,” u Mawthoh u la ong.
Haba kren halor ka jingsngap jar kaba slem jong u, u la ong, “Ka jingsngap jar ruh ka long kaba bha. Ka dei ka por ban pyrkhat biang halor lade hi.”
U la ïathuh ba watla u la rai ban iehnoh ïa ka UDP ha u snem 2023 hadien ba u la rem ha ka elekshon Assembly, u la weng biang ïa ka jingiehnoh jong u hadien ka jingkyrpad jong ki nongïalam ka UDP.
“Dei tang ha u Ïaïong-Jymmang 2025, hadien ki elekshon MP bad MDC, ba nga la pyrkhat ba ka la dei ka por ban iehnoh. Nga la sngew bynñiaw haba nga peit ïa ka rukom treikam bad ka jinglong jong ka saiñpyrthei ha Meghalaya. Ngi don bun ki briew kiba don ka sap, ka bor bad ka jingstad ban ïalam ïa ka jylla sha khmat, hynrei ngim ju lah ban pynïatylli ïa ki,” u la ong.
Haba kylli balei ba u la jied ïa ka BJP watla u wan na ka saiñpyrthei riewlum, u la jubab, “Ka jubab jong nga ka long, balei ym ka BJP? Ka long ka seng saiñpyrthei kaba heh tam ha ka pyrthei, kaba don 140 million ngut ki dkhot bad 20 million ngut ki nongtrei. Ka la ïalam ïa ka ri naduh u snem 2014 bad ka synshar ha ki 22-23 tylli ki jylla ryngkat bad ki seng ba ïatreilang bad ka.”
U la ong ba u ïohi ïa ka jingkylla kaba khraw ha ri India naduh u snem 2014.
“Nga ïohi ïa bun ki jingkylla naduh u snem 2014 — ha ki polisi, ki prokram, ka jingtei ïa ki jingdon jingem, ki jingpynkylla ha ki rukom treikam, ki digital transactions, ki expressway, ki surok bad ki kam jingïarap kiba poi haduh u briew uba dang sah ha ka bynta kaba khatduh tam jong ka imlang sahlang. Ha ka por COVID, nga la don ka jingsheptieng namar ngi don ka jingbun briew kaba 140 klur, mynta kaba la poi 170 klur bad la palat ïa ka China, hynrei ngi lah ban ïaid lyngba kata,” u la ong.
U Dr. Jemino u la ong ruh ba ka jingthmu jong ka BJP ban pynlong ïa India ka ri kaba la kiew shaphrang lyngba ka Viksit Bharat 2047 ka la khring ïa u.
“Ka BJP ka don ka jingthmu ban pynlong ïa India ka ri kaba la kiew shaphrang ha u snem 2047. Da kaba ngi don ka jingbun samla kaba heh tam, ngi lah ban pynurlong ïa kata ka thong,” u la ong.
U la kdew ruh ïa ki mat kiba ïadei bad ka jingïada ïa ka ri bad ka jingwan rung tuh ki briew na ki ri marjan.
“Nga la sngewkmen haba ka BJP ka la jop ha Assam. Haba ngi kren shaphang ka jingïada ïa ka ri bad ka jingwan rung tuh na ki ri marjan, bad ki bor kiba na shabar kiba pyrshang ban pynpait ïa ka ri, lada ka BJP ka don ha ka bor synshar, bun kiei kiei ki lah ban leh. Lada ngi lah ban ïada ïa ka Siliguri Corridor ne ka Chicken Neck, ngi ki briew jong ka Northeast, khamtam ki kynhun jaitbynriew rit, ngin lah ban ring mynsiem da ka jingshngaiñ,” u la ong.
U la pynshai ruh ba ka jingrung jong u sha ka BJP kam dei namar ka kam, ka kyrdan ne ka pisa.
“Kam dei shaphang ka pisa, kam dei shaphang ka kyrdan. Ka dei shaphang ka lynti bad ka jingïalam kaba ka BJP ka pyrshang ban ai sha ki paidbah jong ka ri,” u la ong.
Haba ai khublei ïa ki nongïalam jong ka BJP, u Dr. Jemino u la ong, “Khublei shibun ba phi pdiang ïa nga sha ka longïing jong phi, bad nga kyrmen ba ngan ym pynsngewsih ne pynlehraiñ ïa phi.”
U Dr. Jemino u la ïakhun ruh ïa ka elekshon Lok Sabha ha u snem 2019, ha kaba u la ïoh kumba 2.67 lak vote.
