U Symbud Myntri Rangbah ka Jylla, u Bah Sniawbhalang Dhar, ha ka sngi Palei u la ban jur ba ka jingïapher ha ka niam ka dei ban pynlong ïa ki briew ban ïatylli, ym ban pynïakhlad ïa ki.
U la kren ïa kane ha ka jingïalang kaba 33 jong ka All Faith–All Religion Sadbhavana Sammelan, kaba la pynlong da ka Central Puja Committee Meghalaya, ha ryngkat ka jingïatreilang bad ka Rilbong Durga Puja Committee, Shillong.
Ha kane ka jingïalang la don lang ruh u Myntri Sorkar, Bah Sanbor Shullai, uba dei ruh u MLA ka thaiñ.
Haba ai jingkren ha kane ka jingïalang, u Bah Dhar u la ong ba ka jingïatylli bad ka jingïasngewthuh jingmut hapdeng ki briew ki long ki nongrim ban tei ïa ka imlang sahlang kaba suk. U la kyntu ruh ïa ki paidbah ba kin burom ïa baroh ki niam bad ki jingngeit jong kiwei.
“U Hindu u dei ban long u Hindu uba kham bha, u Khristan u dei ban long u Khristan uba kham bha, bad ki nongbud jong man la ka niam ki dei ban long kiba bud hok bad pynjanai ïa la ka jong ka jingngeit,” u la ong.
U Symbud Myntri Rangbah u la pynpaw ba ka Meghalaya la slem ka la long kum ka nuksa jong ka jingïatylli bad ka jingïasngewjan hapdeng ki niam bapher bapher, ha kaba ki briew ki im ha ka jingïaieid, ka jingïaburom bad ka jingïalong para marjan.
U la ban jur ba kane ka pateng jong ka jingïasuk bad ka jingïalong shipara ka dei ban long kaba la ïada bad pynneh pynsah.
Ïa kane ka Sadbhavana Sammelan, kaba la pynlong hapoh ka phang “Get-Together of Harmony”, la pynlong ban wallam bad kynduh lang jong baroh ki nongïalam niam bad ki nongbud jong ki niam bapher bapher, da ka thong ban kyntiew ïa ka jingïasngewthuh jingmut hapdeng ki niam bad ban pynneh ïa ka jingïasuk ha ka imlang sahlang.
