SHILLONG : Ka jingpyntreikam ïa ka Khasi Social Custom of Lineage Act kam pat dep pura, ha kaba ka Khasi Hills Autonomous District Council (KHADC) ka la phla ba kam shym la lah ban seng ïa ka Tribunal kaba la bthah hapoh ka jingpynkylla jong u snem 2023.
Ïa kane la pynpaw da ka Executive Member kaba khmih ïa ka tnat Law and Legal Matters, ka Kong Deity H Majaw, ha ka por Kylli Jingkylli ha ka Dorbar jong ka Council, haba jubab ïa ka jingkylli ba wanrah da u Nongïalam ka Liang Pyrshah, u Bah Titosstarwell Chyne.
Ha ka jubab kaba la thoh, ka Majaw ka la pynskhem ba ka Executive Committee ka pyntreikam ïa ka Khasi Hills Autonomous District (Khasi Social Custom of Lineage) Act, 1997 bad ki Rules jong u snem 2007, ban ïada, pynneh bad kyntiew ïa ka rukom im tynrai jong ki Khasi kaba bud ïa ka jait na ka kmie.
Hynrei, hadien kata, ka la pdiang ha ka jingïalang jong ka House ba kawei ka bynta kaba kongsan — ka Tribunal ban bishar ïa ki jingïakajia halor ka jingïadei jait — kam pat treikam.
Haba u Chyne u la kylli la la seng ne em ïa ka Tribunal bad kiei ki dkhot jong ka, ka Kong Majaw ka la jubab da kaba ong, “Haduh mynta, ngim pat lah ban thaw ïa ka Tribunal.”
U Chyne u la ong ba kane ka jingpynslem ka long kaba khia, namar ba ka aiñ jong u snem 2023 ka kren shai halor ka jingdonkam ïa ka Tribunal ban pynbeit ïa ki jingïakajia kiba ïadei bad ki clan.
Ka Kong Majaw ka la pynshong nongrim ïa ka jingpynslem ha ka jinglut kaba heh bad ki kyndon ba tyngeh halor ki jingbit bad ki jinglong jong ki briew kiba dei ban long dkhot.
“Ka jinglut kan long kaba heh bha. Ka Tribunal kan don bun ngut ki dkhot bad ki stad. Ngi donkam ïa la kumno kumno uwei u advocate uba don 10 snem ka jingshemphang. Don bun ki jingeh. Ngi dang ïakren bad pyrkhat bad ngin sa ïakren kumno ban pyntreikam ïa ka,” ka la ong.
Ha kawei pat ka jingkylli bynrap na ka MDC ka Nongpoh, ka Kong Rona Khymdeit, halor ka Shaw Bhoi, ka Majaw ka la ong ba ka jingtyrwa ban pynkylla ïa ka aiñ ka dang sah teng.
Ka Kong Khymdeit ka la kdew ba la pynlong ïa ka jingïalang jong ka committee ha kaba sdang jong u snem 2025 ban pynkylla ïa ki kyndon kiba ïadei bad ka Shaw Bhoi hapoh ka Lineage Act.
Ka Majaw ka la jubab ba watla ka jingpynkylla jong u snem 2023 ka la kynthup ïa ka Shaw Bhoi, hynrei ki tymmen basan na Ri-Bhoi ki la dawa mynta ïa ki jingpynkylla kiba kham bniah.
“Ngi la thaw ïa ka committee. Ngi dang ap ïa ki jingmut na ki stad bad ïa ki kyrteng jong ki dkhot na Ri-Bhoi kiba tip bha ïa ka aiñ bad ka dustur jong ka Shaw Bhoi. Dei na kata ka daw ba kane ka kam ka dang sah teng,” ka la ong.
Mynshwa, ka Kong Majaw ka la pyntip ba 113 tylli ki Clan (Seng Kur) ki la wan shakhmat ban pynrung kyrteng naduh ba ka jingpynkylla jong u snem 2023 ka la sdang treikam.
