Shillong : Ka MLP FT ka la pynliem da 5-0 ia ka Mylliem SC, ha ka lympung ialehkai Shillong Premier League 2026, ba la long hynne ka nohphai sngi ha SSA Stadium.
Ha lyndet kane ka nam jop ia ka MLP FT ka la wan hadien ba u Balmingstar Lyngkhoi (4’, 31’, 68’) u la lah ba un lam khmat ia ka kynhhun ban thep haduh lai tylli ki kol, bad ia ki kol kiba sah la thep da u Everestarly Rynjah (61’), katba sa shi kol ka dei ka own goal na u Fedrick Wahlang (77’).
Kane ka lai point ba ka MLP FT ka la ioh ba kan khur ia ka mynta ka sngi ka pynlong ia ka ba na ka kyrdan kaba 8 joit kan kiew mynta sha ka kyrdan kaba 3 ha ka miej iakhein point, ha kaba ka ia ryngkat bad ka Langsning FC tangba ka jingiapher hapdeng kine ar ka long ha ka head to head.
Lada phai pat sha ka kynhun ialehkai ka Mylliem, tden kan iai sahkut shatrai duh ka miej iakhein piint hadien ba ka la lah ba kan ioh khur tang 1 point bad kumba ka long haduh ba kut ka jingiakhun ba hynne ka sngi, shilliang ka jingkhang lah ban ong ba ka la plie lypa ia ka ba kan khreh hiar noh na kane ka lympung iakhun.
Ha kane ka kynti iakhun, ithuh shai kdar ba ka MLP FT ka la iakhun katba lah ba kan wanphai beit da ka jingjop na ka madan iakhun, kaba na ka por sha ka por, ka la nion tyngeh ia ka kut ialehkai ka Mylliem SC, kaba la tynjuh borbah bha ia ki rang ialehkai ki jong ka, katno tam lei lei haba ki rang ialehkai ka MLP FT ki la pyndonkam ia ka la ka bor met.
Ka kol ba nyngkong ba u Balmingstar u la ioh ba un thep ka dei namar ka jingbakla uwei u defender ka Mylliem u la pashat biang shadien ia ka bol ia kaba khlem shim la lah ban poi shajan u Rihoklang Khongjoh rang ap kol ka Mylliem kaba hangne u Balmingstar wut u la beh shaba don ka bol ban ioh pynkhih ia ka jar, ka kol kaba ar pat ka la wan hadien ba u Rapborlang Marwein u la rah shakhmat ia ka bol bad ha ka por ba biang ba un pyllait sha ka jaka ba la don u Balmingstar uba la ioh ban head ia ka.
Hadien kane, u Evereststarly u la ioh ban tehlakam ia ka bol ba la pynbuh sha u da u Bisharlang Kharumnuid bad khyndiat minit hadien jong kane, u Balming sa shisien u la ioh ban tehlakam ia ka bol bad ban pynpar lyngba ki kti u Rihoklang.
Ka kol ba san bad ba khatduh ka wan hadien ba u Rapbor u la shut shapdeng ia ka bol, kaba hangne u Fedrick ha ka jingbakla bad ka bol jlang kan rung sha la ka jong ka kol.
Hynrei kum ka kynhun ka Mylliem kam da dei than ka kynhun ba ialehkai sniew, katno tam lei lei haba ka la lah ruh ba kan da iakhaid da mar lai kol pyrshah bad ka Shillong Lajong FC.
Lashai pat ka sngi ka jingiakhun kan long hapdeng ka Langsning FC pyrshah ia ka Nangkiew Irat SC kaban long ha ka por 3 baje nohphai sngi.
