Shillong Nailar 21
Ki nongñiah kali kamai kiba ju pynkamai ïa ki tourist taxi man la ka sngi na Meghalaya sha Assam ki la pynpaw ba kan long kaba biang eh lada ki ïoh noh ka lad ban kamai tang hapoh ka Jylla lajong bad kan lkng kaba bha tam lada ka jaka pynhiar ïa ki nongleit nongwan kiba leit sha Guwahati bad Kad Liengsuiñ kan dei ha Jorabat lane Khanapara.
Ïa kane ki la pynpaw mynta ka sngi ka 21 tarik Nailar, 2026 haba ki mih lang para nongñiah tourist taxi ha Byrnihat ban pynsangeh ïa ki kali kamai kiba thmu ban leit sha Assam, bad ban khang ruh ïa ki tourist taxi kiba thmu ban wan kiew sha Meghalaya hadien ba ka kynhun ki nongñiah tourist taxi na Assam ki ka bteng ban ïakhih ha Jorabat bad khang lut ïa ki kali kiba don ïa ki number Meghalaya ban leit sha Guwahati bad kiwei ki jaka ha Assam.
Kine ki nongñiah tourist taxi na Meghalaya hapoh ka kynhun “All Khasi Meghalaya Tourist Taxi Association (AKTTA)” ki la pynbna ba kin ïeng ha ka nongrim ban nym leit kamai satia sha Assam bad khang ruh ïa ki tourist taxi na Assam ban wan sha Meghalaya.
Kane ka jingïakhih kaba la bteng mynta la ar sngi, ka dei hadien ba ki nongñiah kali tourist taxi na Assam ki la pynpaw ka jingbitar namar ka jingshah shoh ki briew bad shah pynjulor ki kali kiba don ïa ki number Assam ha ka 19 tarik Nailar, 2026 ha ka por ba pynlong ka Khasi Students’ Union (KSU) ïa ka jingïakhih kaba ïaid da ki ar shaka ha nongbah Shillong.
“Katba ki seng ki nongn̈iah kali tourist na Assam ki dang ïakhih bad pynneh ïa ka rai ban khang ïa ka jingrung ki kali na Meghalaya sha Assam, ngi ruh kum ki nongñiah kali tourist na Meghalaya ngi ïengskhem tylli lang ban nym shah ïa ki tourist taxi na Assam ban wan sha Meghalaya. Kan long kaba biang eh ba ngin kamai tang hapoh ka jylla lajong ha kaba ïa ki nongleit jingleit na Shillong sha Guwahati ngin pynhiar ha Jorabat bad ki kali na Assam ruh kin pynhiar ïa ki nongleit nongwan tang haduh Jorabat,” la pynpaw ki nongkitkam ka AKTTA.
Shuh shuh ka AKTTA ka pynpaw ba ki nongñiah kali tourist taxi na Meghalaya kim duh kamai wat lada pyntreikam ïa kum kane ka jingpyrkhing ban pynkut ïa ka jingleit kamai tang haduh Jorabat.
Kum ban pynkynmaw, ki kynhun jong ki nongñiah tourist taxi na Assam ki la ïalum lang ha Jorabat naduh ka 20 tarik Nailar, 2026 bad khang lynti ïa ki kali kiba don number Meghalaya ban hiar sha Assam bad ki kali na Assam ruh kim dei ban tam ïa ka Jorabat katba ka Sorkar Meghalaya kam pat khot ïakren ban pynbeit ïa kane ka kynrum kynram.
