Shillong, Risaw 8: Ka Sorkar Jylla ka la pynshai ba ka jingpynjlan ïa ka elekshon sha ka Garo Hills Autonomous District Council (GHADC) ka dei namar ki don ar tylli ki kam kiba hap ban pyndep shwa ban pynlong ïa ka elekshon.
Haba kren halor kane, Symbud Myntri Rangbah Bah Prestone Tynsong u la ong ba ka daw kaba nyngkong ka long ka jingpynbeit thymmai ïa ki constituency lyngba ka Delimitation Committee, kaba mynta ka la jan poi sha kaba kut.
“Ngi la pynjlan ïa ka elekshon GHADC namar ki don ar tylli ki kam kiba hap ban pyndep. Kawei ka long ka Delimitation Committee, kaba mynta ka la jan pyndep ïa ka kam,” u la ong.
U la batai ba hadien ba ka Delimitation Committee ka la aiti ïa ka report sha ka District Council, ka Council kan hap ban wanrah ïa ka report sha ka ïingdorbar. Hadien ka jingmynjur jong ka ïingdorbar, yn phah ïa ka report sha u Lat ka Jylla na ka bynta ka jingmynjur.
Ka daw kaba ar, u la ong, ka dei ka Special Intensive Revision (SIR) 2026, kaba yn pynmih ïa ka final publication jong ka electoral roll ha ka 26 tarik mynta u bnai.
U la ong ba ka GHADC ruh kan hap ban pdiang ïa kane ka electoral roll thymmai bad hadien kata yn pynkhreh ïa ki electoral roll na bynta ki constituency bapher bapher ha Garo Hills.
“Ka SIR final publication kan long ha ka 26 tarik mynta u bnai. Kane ka electoral roll kan hap ban ioh ia ka jingmynjur da ka GHADC, bad hadien kata ki Returning Officers kin pynkhreh ïa ki electoral roll na bynta ki constituency bapher bapher,” u la ong.
U la pynshai ruh ba namar ba la don ka jingpynbeit thymmai ha ka electoral roll, hap ban pyniakhlad ïa ki nongthep vote kiba dei ki riewlum bad kiba ym dei ki riewlum.
“Hadien ba la pynbeit ïa ka electoral roll, hap ban pynïapher ïa ki nongthep vote kiba dei ki riewlum bad kiba ym dei ki riewlum. Kine ki dei ki kam kiba hap ban pyndep shwa,” u la ong.
U Bah Prestone u la ong ba tang hadien ba kine ki ar tylli ki kam, kata ka jingphiah Constituency bad ka jingpynkhreh ïa ka electoral roll, kin dep, yn lah ban pynbeit ïa ka tarik jong ka elekshon ha GHADC.
