SHILLONG: U Symbud Myntri Rangbah ka jylla ba dei peit ïa ka tnad Kam Pohïing (Police), u bah Prestone Tynsong, ha ka Sngi Balang u la ong ba ka Sorkar kam lah ban sngap jar haba ka shongsuk-shongsaiñ ka shah pynthut.
Haba jubab halor ki jingkynnoh ba ki Pulit ki dang kem pathar ïa ki briew, u Bah Tynsong u la ong ba ka jingpynshitom ïa kiba pynkheiñ ïa ka aiñ ka long khlem da peit ïa kano-kano ka seng ne u briew uba donkti.
U Bah Tynsong u la kyrpad ruh ïa baroh ba kin kiar na ki kam kiba lah ban wanrah ïa ka jingkulmar ïa ka shongsuk-shongsaiñ.
Ha kaba ïadei bad ka jingdawa kaba la slem ban buh ïa ki Facilitation Centre katkum ka Meghalaya Residents Safety and Security Act (MRSSA), 2016, u Bah Tynsong u la ong ba ka jingïaid ka kam ka la nang ïaid shakhmat.
