SHILLONG : U Myntri ka Koit ka Khiah, u Wailadmiki Shylla, ha ka sngi Balang u la ong ba ka Sorkar Meghalaya ka sngewkhia bha halor ki shnong kiba ym pat poi surok bad ka jingktah jong ka ïa ka jingïoh jingsumar kaba biang.
Haba Jubab halor ka jingkylli, u Myntri u la ong “Peit, kam dei tang namar ba ngi ap ïa kawei ka jingjia ban jia. Kumba nga la kdew dang shen lada phi peit naduh ba la ïoh jylla, nga mut ba ha kine ki 7-8 snem ba la leit, ngi la dep ban shna bun bha ki surok.”
“Hynrei kumba nga la ong, ngim lah ban leh ïa kiei kiei baroh ha kajuh ka por namar ngi don bun ki bynta ba kongsan kiba ngi hap ban peit,” u la bynrap.
Haba pynpaw biang ïa ka jingthmu jong ka Sorkar, u Myntri u la ong, “Ka Sorkar ka khuslai bha bad ngi pyrshang katba lah, khnang ba baroh ki shnong kiba khlem pat poi surok kin ïoh jingïasoh da ki surok kiba biang. Kam long kaba suk ban leh ïa kiei kiei baroh ha kajuh ka por. Shisha, ka Sorkar ka pyrshang katba lah ban pynthikna ba baroh ki shnong kiba ym pat ioh surok kin ioh noh.”
