SHILLONG : Watla ka Meghalaya ka dang bteng ban sakhi ia ka jingnang bun kiba don ai u khniang HIV, hynrei na ka liang u Myntri ka Koit ka Khiah, u Wailadmiki Shylla, ha ka sngi Balang u la ong ba ka Sorkar ka pynleit jingmut pura ha ka jingpynsngewthuh paidbah bad ha ka jingpynkhlaiñ ïa ka rukom ai jingsumar.
Haba pdiang ba um pat ïohi ïa ki jingkheiñ kiba thymmai, u Myntri u la ong, “Mynta ngam pat peit bha, ngam pat kylli ïa ki data haduh mynta, namar ngi pynleit jingmut pura ha ka jingpynsngewthuh paidbah.”
“Ngi dang pynkhreh namar ha ka por ba la leit, kumba nga la dep pyntip, ka Sorkar ka la mynjur ïa ka plan kaba san snem,” u la ong.
“Mynta ngi la ïoh ïa ka jingmynjur na ka Cabinet bad ka jingmang pisa bad baroh, kumta ngi dang don ha ka rukom ban thung bun ngut ki nongtrei bad ban plie shuh shuh ïa ki ART centre, ha kaba ki paidbah kin lah ban wan bad ïoh jingsumar,” u la bynrap.
U Myntri u la ong ba ka jingpynsngewthuh paidbah kaba la sdang mynshwa ka la sdang ban pyni ïa ki jingmih.
“Ha ka por ba la leit ngi la sdang ïa ka programme pynsngewthuh paidbah. Nga sngewkmen ba hadien kata ka jingplie, bun ki kam ki la sdang ban iaid,” u la ong.
“Wat mynta ruh ngi dang pynkhreh ïa ka youth festival kaba yn pynlong da ka MACS, ban pynthikna ba kham bun ki briew kin wan bad ïasnoh lang bad ngi ban ïakhun pyrshah ïa ka HIV,” u Myntri u la ong.
