Mairang, Naitung 11:
Katba nang ïaid ki sngi, u Dr DRL Nonglait u la nang ïoh jingkyrshan shuh shuh na ki paidbah kylleng ka Ri Khasi Jaiñtia na ka bynta ban ïakhun ïa ka ilekshon MP shiteng samoi na Shillong Lok Sabha Constituency.
Ha ka jingïalang paidbah kaba la pynlong da ka National People’s Party (NPP) ha Mairang ha ka sngi Saitjaiñ ka 11 tarik Naitung, 2026, ki paidbah ki la wan ban kyrshan ïa u Dr Nonglait ha kaba kiba bun ki dei kiba ju kyrshan ïa ka Congress.
Kine ki nongkyrshan hapoh ka jingïalam u Bah R. Nongseij, uba long ruh u President ka Mairang Block Congress Committee ki la wan ban pynïasoh sha ka NPP na ka bynta ban kyrshan pura ïa u Dr Nonglait ha kane ka ilekshon MP shiteng samoi kaba yn sa pynbna shen da ka Election Commission.
U Bah Nongsiej ha ryngkat bad ki spah ngut ki nongkyrshan ki la shim ïa ka rai ban iehnoh ïa ka Congress bad kin ai jingkyrshan pura ïa ka NPP bad ïa u Dr Nonglait ha kane ka kynti.
Ha kane ka sngi, ki la pynpaw ba kane ka jingrung jong ki sha ka NPP ka dei ka dak kaba shai ba ka seng ka la nang kiew man la ka sngi bad ïoh jingkyrshan na ki paidbah ha kylleng ka Ri Khasi bad Ri Jaiñtia bad trei shitrhem na ka bynta jong u Dr Nonglait.
Na ka liang ki nongialam ka NPP ki la ong ba kat shaba leit ki paidbah ki la sngewthuh ïa ka jingdonkam ban ïoh ka synshar ka khadar kaba ïaid ryngkat bad ki kam ban kyntiew ïa ka jylla.
Ki la ong ruh ba ki paidbah mynta ki la sngewthuh ba kim dei shuh ban shah ïalam bakla lyngba ki jingkren kiba pynrung ha ka jingmut jingpyrkhat ki nongshong shnong ban isih Sorkar, hynrei kin ïatylli lang ban ai ka jingshaniah ïa ka NPP kaba lah ban wanrah shibun ki kam pynroi bad jingkylla ha ka jylla.
