SHILLONG : U nongïalam ba rangbah ka Trinamool Congress (TMC) bad uba long ruh u Nongïalam ka Liang Pyrshah, u Dr. Mukul Sangma, u la pynshai ba un ym leit satia sha ka BJP lane sha kano kano ka seng saiñ pyrthei jong ka ri, bad u la ong ruh ba ka BJP kan ym lah ban pynpra ïa ka TMC ha Meghalaya.
“Ka BJP kan ym lah satia ban pynpra ïa ka TMC ha Meghalaya. Bad haba ïadei bad nga, u Mukul Sangma, ngan ym leit sha ka BJP lane sha kano kano kawei pat ka seng saiñ pyrthei, wat sha kino kino ki National Party ruh,” ong u Dr. Mukul haba kren bad ki lad pathai khubor.
U Dr. Mukul, uba la long teng u Myntri Rangbah ka Jylla, u la jubab ïa kane hadien ba la kylli ïa u la ka BJP ka la ïakynduh ne-em ban ïakren bad u ban pynïasoh sha kane ka seng.
Haba kylli la ka BJP ka la pyrshang ban ïakren bad u ne em, u Dr. Mukul um shym la pynthikna ne kyntait ïa kane. Hynrei u la ong, “Ym lah ban kyntait ba ka BJP ka lah ban ïakynduh bad bun ngut ki briew. Nga la ai nuksa na kiwei pat ki Jylla. Balei nga ai ïa kine ki nuksa? Phi hap ban pyrkhat bad sngewthuh ïa ka jingmut jong ki kyntien.”
U la bynrap ruh, “Ngam donkam ban jubab beit ïa kane ka jingkylli, namar nga kwah ban ong da ka jingsngew burom ba ngam kwah ban jubab ïa kane. Wat lada ki la wan ïakren bad nga ruh, ngam ïathuh ïa phi.”
Haba kylli pat halor ka jingkynnoh ba ka BJP ka pyrshang ban pynïakhlad ïa ki nongïalam ka TMC ha Meghalaya, u Dr. Mukul u la ong ba un ym kwah ban kren halor kane namar ba ka BJP kan ym lah ban pynpra ïa ka seng jong ki ha Meghalaya.
“Ngam kwah ban kren halor kane, namar ha Meghalaya hi, kim lah ban pynpra ïa ngi. Kumta ngam kwah ban kren halor kane,” u la ong.
